ក្រុម Barcelona បន្ដធ្វើមិនបានល្អទៀតហើយ ដោយសូម្បីប្រកួតដណ្ដើមពានមិត្តភាពក៏ពួកគេធ្វើមិនបានសម្រេចផង ដោយចាញ់ក្រុម Boca Junior ក្នុងលទ្ធផលប៉េណាល់ទី ៤-២ ក្រោយស្មើ ១-១។
សម្រាប់ការប្រកួតនេះដែរ ក្រុមអ្នកមានបុណ្យក៏បានដាក់ខ្សែការពារចាស់វស្សា Dani Alves ឱ្យចូលលេងផងដែរ ព្រោះជាការប្រកួតមិត្តភាពក្រៅផ្លូវការមួយ។ ខណៈដែលនៅក្របខណ្ឌ La Liga កីឡាករប្រេស៊ីលរូបនេះនឹងត្រូវរង់ចាំដល់ខែមករា ទើបអាចចូលលេងជួយក្រុមបាន។ តែយ៉ាងណាលទ្ធផលនៃការប្រកួត គឺក្រុមអ្នកមានបុណ្យជាបរាជ័យ ដោយបាល់ប៉េណាល់ទី ៤-២ ក្រោយពីពួកគេលេងស្មើ ១-១ នៅម៉ោងប្រកួត។
ការរបូតពានរង្វាន់មិត្តភាពនេះដែរ ក៏បានបញ្ជាក់ថាក្រុមអ្នកមានបុណ្យមិនទាន់រកឃើញទម្រង់លេងល្អបំផុតរបស់ខ្លួននោះទេ។ លោក Xavi ដែលជាអ្នកចាត់ការក្រុមនឹងស្វះស្វែងរកកីឡាករចំណូលថ្មីមកបំពេញបន្ថែមនៅខែមករាខាងមុខនេះមិនខាន៕ប្រភព៖ MARCA
