ក្លឹបនៅ Premier League ចង់ចាត់វិធានការលើសមាជិកក្រុមនីមួយៗ ដោយអាចនឹងកាត់ប្រាក់ឈ្នួលកីឡាករ ប្រសិនបើពួកគេមិនចាក់វ៉ាក់សាំងកូវីដ១៩ ហើយឆ្លងមេរោគនេះមិនអាចចូលលេងបាន។
ក្រុមនៅអង់គ្លេសច្រើនហើយដែលកំពុងមានកីឡាករឆ្លងកូវីដ១៩ ហើយអ្នកខ្លះក្នុងចំណោមនោះមិនទាន់បានចាក់វ៉ាក់សាំងកូវីដ១៩នោះទេ។ ស្របពេលរដ្ឋាភិបាលអង់គ្លេសវិញ ក៏កំពុងជំរុញឱ្យអ្នករស់នៅក្នុងប្រទេសសម្រុកចាក់វ៉ាក់សាំងដូសជំរុញ ឬចាក់ឱ្យបានគ្រប់គ្នាផងដែរ។ ការប្រកាសនេះ ធ្វើឡើងបន្ទាប់ពីមានលេចចេញមេរោគប្រភេទថ្មី Omicron កើតឡើង ដែលជាមេរោគឆ្លងលឿន។
ដោយសារតែមើលឃើញថាមានកីឡាករមិនចង់ចាក់ច្រើនហើយ ទើបបានជាក្លឹបទាំងអស់ទំនងជានឹងមានវិធានការខ្លះហើយ។ ពួកគេអាចនឹងធ្វើតាមក្លឹប Bayern Munich នៅអាល្លឺម៉ង់ ដែលកីឡាករណាឆ្លងកូវីដ១៩ ហើយមិនបានចាក់វ៉ាក់សាំងគឺត្រូវកាត់ប្រាក់ឈ្នួលអំឡុងពេលពួកគេកំពុងសម្រាកព្យាបាល។ ការធ្វើបែបនេះដើម្បីឱ្យកីឡាករយល់ព្រមទៅចាក់វ៉ាក់សាំងគ្រប់គ្នា៕ប្រភព៖ DailyMail
