ដូចអ្នកបានដឹងស្រាប់ហើយ វត្តមាន Sergio Aguero ប្រហែលជានឹងមិនអាចរំលេចសារជាថ្មីទេ លើទីលានឲ្យក្លឹប Barcelona ក្រោយយើងលឺថា កីឡាករក៏ត្រៀមនឹងប្រកាសចូលនិវត្តហើយនៅពេលឆាប់ៗខាងមុខ។ ដោយសារបញ្ហាបេះដូង ទើបនាំឲ្យកីឡាករអាហ្សង់ទីន ត្រូវបង្ខំចិត្តបញ្ចប់អាជីពទាំងនៅក្មេងខ្ចី ទើបតែ ៣៣ ឆ្នាំ។
បើតាមសារព័ត៌មាន Independent ចុះផ្សាយថា ក្លឹបយក្សនៅតំបន់កាតាឡូញ៉ា ក៏បានគិតគូរលើការនាំយកអ្នកថ្មីមកជំនួស កំឡុងទីផ្សារដោះដូរខែមករាខាងមុខផងដែរ ហើយពួកគេសម្លឹងឃើញខ្សែប្រយុទ្ធសញ្ជាតហ្គាប៊ុង នៃក្លឹប Arsenal គឺកីឡាករ Pierre-Emerick Aubameyang។
នេះក្រោយសង្កេតឃើញ Aubameyang កំពុងរងភាពរកាំរកូសជាមួយក្លឹប Arsenal ហើយក៏មិនបានធ្វើឲ្យអ្នកចាត់ការលោក Mikel Arteta ពេញចិត្តនឹងសកម្មភាពរបស់គេនោះដែរ ដល់ថ្នាក់សម្រេចដកស្លាកប្រធានក្រុមចេញពី តារាឆ្នើមខាងលើទៀតផង។
យ៉ាងណាសម្រាប់ការផ្ទេរមក Barcelona សារនេះ ទំនងជា ក្លឹបយក្សអេស្ប៉ាញមិនប្រើប្រាស់លុយសុទ្ធនោះទេ ផ្ទុយមកវិញ គឺ ប្រើប្រាស់ឈ្មោះ Ousmane Dembele ជាថ្នូរដោះដូរស្មើ ហើយតម្លៃពលកម្មរបស់ Aubameyang ទៀតសោត ក៏សុំឲ្យចុះទាបជាង ៣៥០ ០០០ ផោន/សប្តាហ៍ផងដែរ៕
ប្រភព៖ Independent