ការប្រកួតកីឡាកាយសម្ព័ន្ធជ្រើសរើសជើងឯកថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន លើកទី៥ ឆ្នាំ២០២១ បានបិទបញ្ចប់ដោយជោគជ័យ កាលពីល្ងាចថ្ងៃទី១៣ ខែធ្នូ ឆ្នាំ២០២១ នៅសាលាបឋមសិក្សាសាលាលេខ៥ ស្រុកកំពង់ត្រឡាច ខេត្តកំពង់ឆ្នាំង។
ការប្រកួតកីឡាកាយសម្ព័ន្ធថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន ឆ្នាំនេះ គឺជាគោលបំណងចម្បង ក្នុងការសម្រួចគុណផលកីឡាកាយសម្ព័ន្ធ ឆ្ពោះទៅចូលរួមប្រកួតប្រជែង ស៊ីហ្គេម លើកទី៣១ នាខែឧសភា ឆ្នាំ២០២២ នៅប្រទេសវៀតណាម និងត្រៀមឆ្ពោះទៅទទួលធ្វើម្ចាស់ផ្ទះ
កីឡាស៊ីហ្គេម លើកទី៣២ ឆ្នាំ២០២៣ នៅព្រះរាជាណាចក្រកម្ពុជា។ អ្វីដែលពិសេស គឺផ្នែកកាយសម្ព័ន្ធអាអេរ៉ូប៊ិក ត្រូវបានផ្តោតសំខាន់ខ្លាំង សម្រាប់ឆ្ពោះទៅប្រកួតស៊ីហ្គេម ឆ្នាំ២០២២ ឲ្យមានលទ្ធផលដ៏គាប់ប្រសើរ ដើម្បីវាស់ស្ទង់កម្រិតសមត្ថភាព សម្រាប់ស៊ីហ្គេម ឆ្នាំ២០២៣។ ដើម្បីត្រៀមស៊ីហ្គេមគោលដៅ ២លើក ចំពោះមុខនេះ ក្រុមជម្រើសជាតិកាយសម្ព័ន្ធនឹងត្រៀមចេញទៅហ្វឹកហាត់នៅប្រទេសចិនផងដែរ។
ឆ្លងកាត់ការប្រកួតយ៉ាងស្វិតស្វាញលើគ្រប់វិញ្ញាសា គណៈកម្មការបច្ចេកទេស សម្រិតសម្រាំងបានលទ្ធផលបច្ចេកទេសលើកវិញ្ញាសាកាយសម្ព័ន្ធអាទីស្ទីក ៦វិញ្ញាសា និងកាយសម្ព័ន្ធអាអេរ៉ូប៊ិកសរុប ៥វិញ្ញាសា គឺក្លិបកាយសម្ព័ន្ធក្រសួងមហាផ្ទៃ ឈរនៅចំណាត់ថ្នាក់លេខ១ ដោយដណ្តើមបានមេដាយមាស ៤, លេខ២ ខេត្តក្រចេះ មេដាយមាស ៣, ខេត្តកំពង់ឆ្នាំង មេដាយមាស ៣ និងខេត្តតាកែវ មេដាយមាស ១។ ក្រៅពីនេះ ក៏មានជ័យលាភីលេខ២ និងលេខ៣ អមលើវិញ្ញាសាសរុបទាំង ១១នេះផងដែរ៕