ក្រោយការផ្ទេរមកក្លឹប Man Utd ជាលើកទីពីរ សម្រាប់រដូវកាលដំបូង ២០២១/២២ តារាឆ្នើម Cristiano Ronaldo បង្ហាញខ្លួនសរុប ១៨ ប្រកួត រកបាន ១៣ គ្រាប់និង Assist ២ លើកហើយ។ នេះនៅតែរាប់បាន ជាស្ថិតិដ៏គួរឲ្យចាប់អារម្មណ៍ ដ្បិតអីវ័យរបស់កីឡាករព័រទុយហ្គាល់ ក៏កាន់តែចំណាស់ចូលដល់ ៣៦ ឆ្នាំ។
គ្រាប់បាល់សំខាន់ៗ ដែលអ្នកគាំទ្រ Man Utd សាទរបំផុត គឺច្រើនជាគ្រាប់បាល់ចុងម៉ោង ធ្វើបានដោយ CR7 អាចកាត់កងយក ១ ឬ ៣ ពិន្ទុឲ្យក្រុម ជាជាងការដែលបរាជ័យ។ ខាងក្រោម CTS Sports រំឭកពេលវេលា ៤ លើកដែល Ronaldo រកបានគ្រាប់បាល់ចុងម៉ោង ល្មមឲ្យអ្នកគាំទ្រក្រុមគូប្រជែងស្ងាត់មាត់ជ្រាបក្នុងកីឡដ្ឋាន៖
៤) ប្រកួតទល់ Villarreal
កាលពីថ្ងៃទី ៣០ កញ្ញា នៅជុំទី ២ វគ្គចែកពូល UCL តាមថា United ត្រូវស្មើយកបាន ១ ពិន្ទុទេ ក្នុងការលេងទល់ Villarreal នៅទឹកដីខ្លួនឯង គឺ Old Trafford។ ពេលនោះ Paco Alcacer ខាងក្រុមភ្ញៀវជាអ្នករកបានគ្រាប់បាល់នាំមុខមុន នៅនាទី ៥៣ លុះរំលង ៧ នាទីបន្ទាប់ ខ្សែការពារ Alex Telles អាចធ្វើបានតាមស្មើ។
លទ្ធផល ១-១ រក្សារហូតដល់នាទី ៩៤ ដែលខ្វះតែប៉ុន្មានវិនាទី ត្រូវចប់ការប្រកួតទៅហើយ ក៏ស្រាប់តែ Ronaldo បានសហការជាមួយ Jesse Lingard ក្នុងប្រអប់ ហើយបញ្ចប់ទីយ៉ាងស្អាត សម្រេចយក ៣ ពិន្ទុពី Villarreal។
៣) ប្រកួតទល់ Atalanta ជុំទី ៣
នៅឯកីឡដ្ឋាន Old Trafford កាលពីថ្ងៃទី ២១ តុលា ដែល United បើកការប្រកួត ស្វាគមន៍ក្រុមភ្ញៀវ Atalanta គឺលទ្ធផលបញ្ចប់ ជាមួយការយកឈ្នះ ៣-២។
Mario Pasalic និង Merih Demiral ជាអ្នករកបានគ្រាប់បាល់ឲ្យ Atalanta ខណៈដែល Marcus Rashford និង Harry Maguire ជាអ្នកយកពីរគ្រាប់ ឲ្យ United អាចតាមស្មើ។ ប៉ុន្តែតួឯក គឺជា Ronaldo ដែលនៅនាទី ៨១ កើតមានបាល់ក្រុសចូលក្នុងប្រអប់ ពីសំណាក់ខ្សែការពារ Luke Shaw ហើយខ្សែប្រយុទ្ធព័រទុយហ្គាល់ ប្រើប្រាស់បច្ចេកទេសលោតខ្ពស់ ទៅតែតបាល់ យក ៣ ពិន្ទុ ល្មមឲ្យអ្នកគាំទ្រស្រែកហ៊ោផ្អើលកីឡដ្ឋាន។
២) ប្រកួតទល់ Atalanta ជុំទី ៤
នៅវគ្គចែកពូលដដែល រំលងទៅដល់ប្រកួតទល់ Atalanta ក្នុងទឹកដីអ៊ីតាលី គឺបានខ្ញីចាស់វ័យ ៣៦ ឆ្នាំខាងលើដដែល អាចរកបានពីរគ្រាប់ម្នាក់ឯង សង្រ្គោះក្រុមពីការរបូត ៣ ពិន្ទុទៅឲ្យក្រុមម្ចាស់ផ្ទះ។
នៅនាទីទី ១២ កីឡាករ Josip Illicic បានបើកការនាំមុខ ឲ្យ Atalanta ហើយដល់នាទី ៤៥+១ Ronaldo រកបានគ្រាប់បាល់តាមស្មើ។ ចូលដល់តង់ទី ២ នាទី ៥៦ Duvan Zapata ក៏បន្ថែមគ្រាប់បាល់ទីពីរ ល្មមឲ្យអ្នកគាំទ្រ Atalanta សប្បាយចិត្ត ថាក្រុមនឹងយកបាន ៣ ពិន្ទុទៅហើយ តែមានឯណា ដល់នាទី ៩០+១ Ronaldo បែរជាកាប់បាល់ពាក់កណ្តាល Volley ពីក្រៅប្រអប់ ផុតដៃអ្នកចាំទីយ៉ាងស្អាត ធ្វើឲ្យអ្នកគាំទ្រក្រុមម្ចាស់ផ្ទះមានការស្រងាកចិត្តជាខ្លាំង។
១) ប្រកួតទល់ Norwich City
ចូលមកដល់ការដឹកនាំ របស់អ្នកចាត់ការថ្មី លោក Ralf Rangnick កីឡាករវ័យ ៣៦ ឆ្នាំក៏នៅតែបន្តដើរតួជាវីរបុរសសង្រ្គោះក្រុម តាមរយៈបាល់ចុងម៉ោងដដែល នេះវាទើបតែកើតឡើងថ្មីថ្មោង កាលពីប្រកួតជុំទី ១៦ នៅ PL។
Man Utd យកបាន ៣ ពិន្ទុ ដោយលំបាកពី Norwich City ហើយក៏បានគ្រាប់បាល់ប៉េណាល់ទីនៅនាទី ៧៥ ធ្វើបានដោយ Cristiano Ronaldo។ នេះសបង្ហាញច្បាស់ថា Ronaldo តែងតែជាកីឡាករ ដែលជាអ្នកសម្រេចចម្លើយ ចាញ់-ឈ្នះ ក្នុងការប្រកួត ហើយក៏ជាអ្នកសង្គ្រោះដ៏អស្ចារ្យមួយដែរសម្រាប់ក្លឹបបិសាចក្រហម៕