គិតត្រឹមជុំទី ១៧ នៅក្របខ័ណ្ឌ Premier League ក្រុមធំ ៣ កំពុងប្រជែងពិន្ទុគ្នាយ៉ាងប្រកៀកប្រកិត ដោយ Man City ឈរកំពូលតារាង មាន ៤១ ពិន្ទុ ដេញពីក្រោយដោយ Liverpoool មាន ៤០ ពិន្ទុ និង Chelsea មាន ៣៨ ពិន្ទុ។
មកដល់រដូវកាល ២០២១/២២ មានមតិជាច្រើន លើកឡើងថា អាចជាឆ្នាំដែល Chelsea លើកពានលីគកំពូលអង់គ្លេស ក្រោយខកខានតាំងពីឆ្នាំ ២០១៧ តែយ៉ាងណា បើយើងមើលតាមស្ថានភាពនៅប៉ុន្មានប្រកួតចុងក្រោយ និងពេលវេលាទៅមុខ ដែលត្រូវឆ្លងកាត់ឧបសគ្គធំមួយ នៅចន្លោះខែមករា-កុម្ភៈ នោះគឺនៅតែជាក្រុមការពារជើងឯក City ដដែល រាប់ថា មានភាគរយខ្ពស់បំផុត។
ក៏ដោយសារតែមានការផ្សារភ្ជាប់ទៅនឹងកាលវិភាគប្រកួតពានរង្វាន់ប្រចាំទ្វីបអាហ្វ្រិក ឬ Africa Cup of Nations ដែលត្រូវលេងចន្លោះថ្ងៃទី ៩ មករា ដល់ ៦ កុម្ភៈ ឆ្នាំ ២០២២។ នេះមានន័យថា កីឡាករសំខាន់ៗ ដែលមានសញ្ជាតិ ជាជនជាតិអាហ្រិ្វក នឹងមានភារកិច្ចត្រូវទៅជួយជម្រើសជាតិ ដូចកាលកីឡាករនៅអឺរ៉ុប ទៅជួយក្រុមលេងព្រឹត្តិការណ៍ Euro អ៊ីចឹងដែរ។
ប៉ុន្តែវាពិបាកត្រង់ថា ព្រឹត្តិការណ៍សារនេះ គឺលេងចំពាក់កណ្តាលរដូវកាល នៃការប្រកួតក្នុងលីគតែម្តង ដូច្នេះក្រុមណាដែលមានកីឡាករស្នូលសំខាន់ៗ ជាជនជាតិអាហ្វ្រិកច្រើនរូប គឺនឹងក្លាយជាក្រុមដែលរងផលប៉ះពាល់ខ្លាំងបំផុត។
ខាងក្រោមយើងបង្ហាញសមាសភាពកីឡាករនៃក្រុមធំទាំង ៣ ដែលប្រឈមនឹងខកខាននាកំឡុងពេលខាងមុខ៖
Man City នឹងត្រូវអវត្តមាន ខ្សែប្រយុទ្ធ Riyad Mahrez នៃក្រុមជម្រើសជាតិអាល់ហ្សេរី
Chelsea នឹងត្រូវអវត្តមាន អ្នកចាំទី Edouard Mendy នៃក្រុមជម្រើសជាតិសេណេហ្គាល់ និងខ្សែប្រយុទ្ធ Hakim Ziyech នៃក្រុមជម្រើសជាតិម៉ារ៉ុក
Liverpool នឹងត្រូវអវត្តមាន ខ្សែបម្រើ Naby Keita នៃក្រុមជម្រើសជាតិហ្គីណេប៊ីសៅ ខ្សែប្រយុទ្ធ Sadio Mane នៃក្រុមជម្រើសជាតិសេណេហ្គាល់ និងខ្សែប្រយុទ្ធ Mohamed Salah នៃក្រុមជម្រើសជាតិអេហ្សីប
ដូចបង្ហាញខាងលើ ក្រុមដែលរងផលប៉ះពាល់ខ្លាំងជាងគេ គឺ Chelsea និង Liverpool ដែលកីឡាករត្រូវអវត្តមាន គឺសុទ្ធតែជាកីឡាករសំខាន់ខ្លាំង។ បើសួរថា តើកាលវិភាគប្រកួតនៃក្លឹបណា ដែលស្មុគស្មាញជាងគេ នៅកំឡុងពេលដែលត្រូវអវត្តមានកីឡាករ? នោះគឺ Chelsea ដែលត្រូវប៉ះ Liverpool នាថ្ងៃទី ២ មករា, ប៉ះ Man City នាថ្ងៃទី ១៥ មករា និងប៉ះ Tottenham នាថ្ងៃទី ២៣ មករា។ដូច្នេះហើយចន្លោះពេលនោះ បើក្លឹបមានការ ខាតបង់ពិន្ទុជាបន្តបន្ទាប់ នោះក៏ជាពេលដែលអាចបើកផ្លូវឲ្យ City បន្ថែមគម្លាតដាច់កាន់តែឆ្ងាយផងដែរ។
បើតាមអ្នកវិភាគជាច្រើនលើកឡើងថា ការដែល Chelsea ត្រូវលេងដោយគ្មាន Mendy ជាអ្នកចាំទីនៅពេលខាងមុខ នោះគឺក្រុមអាចនឹងធ្លាយសំណាញ់ទីច្រើន។ ជាក់ស្តែងតាមការបញ្ជាក់កន្លងទៅ ពីអ្នកវិភាគលោក Jamie O’Hara និយាយដែរថា៖ “ពេលប្រកួតប្រចាំទ្វីបអាហ្រ្វិកឈានចូលមកដល់ ក៏ជាពេលដែល Mendy ត្រូវអវត្តមាន ហើយវាជារឿងគួរឲ្យបារម្ភណាស់ ព្រោះខ្ញុំមិនគិតថា Chelsea អាចលើកពានលីគកំពូល ដោយប្រើប្រាស់វត្តមាន Kepa នោះទេ”។
ចំណែកឯ Liverpool ការដែលអវត្តមានម្តងទាំងពីរព្រមគ្នា រវាង Salah និង Mane ក៏ជារឿងដែលត្រូវខ្វល់ខ្វាយចិត្តបំផុតដែរ តែយ៉ាងណា ៣ ប្រកួតចន្លោះពេលនោះ គឺត្រូវប៉ះក្រុមខ្លាំងតែ Chelsea មួយគត់ ខណៈពីរក្រុមផ្សេងទៀត ប៉ះក្រុមគីឡូមធ្យម Brentford និង Crystal Palace។ លទ្ធផលបែបណា យើងនឹងរង់ចាំមើលទាំងអស់គ្នា លើទំព័រ CTS Sports៕