ក្រុមបិសាចក្រហម Manchester United បានយកឈ្នះលើក្រុម Norwich ដែលស្ថិតនៅបាតតារាងដោយពិបាក ពោលគឺត្រឹមលទ្ធផល ១-០ ប៉ុណ្ណោះហើយ១គ្រាប់នោះជាបាល់ប៉េណាល់ទីថែមទៀត។
ក្រោយពីចប់ការប្រកួតទៅ លោក Ralf Rangnick អ្នកចាត់ការក្រុម Man Utd បាននិយាយថាមិនពេញចិត្តចំពោះការលេងរបស់ក្រុមនៅប្រកួតនេះឡើយ។ ពួកគេសហការគ្នាមិនបានល្អនោះទេ ប៉ុន្តែជាសំណាងមួយដែលក្រុមមានអ្នកចាំទីល្អ David de Gea សង្គ្រោះបាល់គ្រោះថ្នាក់បានច្រើន។ បុរសវ័យ៦៣ឆ្នាំរូបនេះ បានចាត់ទុកជ័យជម្នះលើក្រុម Norwich City គឺដោយសារតែមានអ្នកចាំទី De Gea ជួយប៉ុណ្ណោះ។
រំលឹកថាត្បិតពិបាកក្នុងការយកឈ្នះលើក្រុម Norwich មែន ប៉ុន្តែលទ្ធផល ១-០ នេះក៏បានធ្វើឱ្យក្រុមបិសាចក្រហមរក្សាកំណត់ត្រាល្អផងដែរ។ ពួកគេលេង២ប្រកួត ឈ្នះទាំង២ប្រកួត និងរក្សា Clean-sheet បានថែមទៀតផង ក្រោមការដឹកនាំរបស់លោក Rangnick ដែលជាអ្នកចាត់ការថ្មីនេះ៕ប្រភពDailymail
