ខ្សែបម្រើ Angel di Maria បានអះអាងថាគ្រប់គ្នានៅក្លឹប PSG កំពុងព្យាយាមជាខ្លាំងដើម្បីឱ្យខ្សែប្រយុទ្ធ Lionel Messi ងាយស្រួលរស់នៅប្រទេសបារាំង។
Messi បានចូលរួមជាមួយក្លឹប PSG នារដូវកាលនេះ ក្រោយពីរូបគេអស់កុងត្រានៅក្លឹប Barcelona ។ តែម្ចាស់ពានរង្វាន់ Ballon dÓr ឆ្នាំនេះ ហាក់មិនសប្បាយចិត្តក្នុងការនៅបារាំងឡើយ ជាពិសេសការលេងនៅលីគកំពូលតែម្ដង ដោយបង្ហាញទម្រង់លេងមិនបានល្អសោះ។ ខណៈដែលប្រភពជាច្រើនក៏អះអាងថារូបគេមិនសប្បាយចិត្តក្នុងការរស់នៅទីនេះដែរ តាំងតែពីពេលដំបូងម្ល៉េះ។
ចំពោះរឿងនេះដែរ Di Maria មិត្តរួមក្រុមនៅ PSG បានអះអាងដែរថាគ្មាននរណាម្នាក់ក្នុងក្លឹបនេះចង់ឱ្យ Messi ពិបាកនោះទេ។ ពួកគេតែងតែព្យាយាមជួយឱ្យកីឡាករអាហ្សង់ទីនសប្បាយចិត្ត និងធ្វើឱ្យជីវិតគេងាយស្រួលជានិច្ច។ អតីតកីឡាករ Real Madrid ក៏សង្ឃឹមថាប្រកួតទៅមុខទៀត នឹងធ្វើឱ្យ Messi រកគ្រាប់បាល់បានវិញផងដែរ៕ប្រភព Marca
