លោក Joan Laporta ប្រធានក្លឹប Barcelona បានចេញវីដេអូសុំអ្នកគាំទ្រទាំងអស់ឱ្យបន្ដគាំទ្រក្លឹបទៀត ព្រោះថានៅខែមករាខាងមុខនេះនឹងមានការផ្លាស់ប្ដូរកីឡាករច្រើននាក់មិនខាន។
ក្រុម Barcelona បានធ្លាក់ចេញពីពានរង្វាន់ UEFA Champions League ហើយនៅត្រឹមវគ្គចែកពូលប៉ុណ្ណោះ។ ខណៈដែលការទៅលេងនៅពានរង្វាន់ Europa League បានធ្វើឱ្យអ្នកគាំទ្រមិនសប្បាយចិត្តនោះទេ ព្រោះតាំងពីឆ្នាំ២០០០មក ក្លឹបមួយនេះមិនដែលរបូតឱកាសឬធ្លាក់ទៅលេងនៅពានរង្វាន់លំដាប់ទី២នៅអឺរ៉ុបនេះឡើយ។
ដើម្បីលើកទឹកចិត្តអ្នកគាំទ្រវិញ លោក Laporta បានអះអាងថាថ្នាក់ដឹកនាំក្លឹបនឹងស្វះស្វែងរកគ្រប់វិធីដើម្បីកែប្រែស្ថានការណ៍ឡើងវិញ។ ខណៈដែលខែមករាខាងមុខ នឹងមានការផ្លាស់ប្ដូរច្រើននាក់មិនខាន។ Barcelona នឹងត្រលប់ទៅរកភាពខ្លាំងរបស់ខ្លួនវិញម្ដងទៀត ហើយនៅពេលនេះវិធីសាស្ត្រនានាក៏កំពុងដំណើរការទៅមុខផងដែរ៕ប្រភព Marca
