អតីតកីឡាករនៅក្លឹបបិសាចក្រហម Man Utd លោក Park Ji-sung បានបង្ហាញការយល់ឃើញថា តារាឆ្នើមក្លឹប Tottenham Hotspur ក៏ដូចជាបុរសរួមសញ្ជាតិគឺ Son Heung-min គេមានលក្ខណៈសម្បត្តិគ្រប់គ្រាន់ អាចនឹងផ្ទេរទៅក្លឹបម្ចាស់ដី Old Trafford បាន គ្រាន់ថាមិនអាចបន្តប្រើប្រាស់អាវលេខ ៧។
ប្រាប់សារព័ត៌មាន Goal លោក Park និយាយ៖ “Son គេបានបង្ហាញមកច្បាស់ហើយនៅ Premier League ហើយខ្ញុំក៏ជឿថា គេល្អគ្រប់គ្រាន់នឹងអាចទៅចូលរួមនៅ Man Utd តែបញ្ហាត្រង់ គេនឹងមិនអាចប្រើប្រាស់អាវលេខ ៧ ដោយសារមាន Cristiano Ronaldo នៅទីនោះហើយ”។
លោកបន្ត៖ “ប្រសិនឲ្យខ្ញុំជ្រើសរើសកីឡាករឯទៀត បន្ទាប់ពី Son ខ្ញុំសុំនិយាយថា Hwang Hee-chan នៃក្លឹប Wolves និង Lee Kang-in នៃក្លឹប Mallorca ដែលពួកគេក៏មានឥទ្ធិពលក្នុងនាមជាកីឡាករដ៏ល្អម្នាក់ផងដែរ”។
គួរបញ្ជាក់ថា ខ្សែប្រយុទ្ធស្លាបវ័យ ២៩ ឆ្នាំ បានរួមជើងនៅក្លឹបមាន់ខ្នាយមាសតាំងតែពីរដូវក្តៅ ឆ្នាំ ២០១៥។ សរុបការបង្ហាញខ្លួន ២៩៩ ប្រកួត គេរកបាន ១១៤ គ្រាប់និង Assist ៦៧ លើក ខណៈដែលសុពលភាពកុងត្រានៅសេសសល់ដល់ចុងខែមិថុនា ឆ្នាំ ២០២៥ ឯណោះ៕
ប្រភព៖ Goal