កាលពីថ្ងៃទី ២៩ វិច្ឆិកា ឆ្នាំ ២០២១ កន្លងទៅ តារាឆ្នើម Lionel Messi បានសាងប្រវត្តិសាស្ត្រថ្មី ក្នុងនាមជាកីឡាករបាល់ទាត់ដំបូងបង្អស់ ដែលអាចលើកពានរង្វាន់ Ballon d’Or ដល់ទៅ ៧ សម័យកាល។
ពានរង្វាន់ដែលមានអាយុកាល ៦៥ ឆ្នាំមួយនេះ ត្រូវបានបង្កើតឡើងដោយ France Football Magazine របស់ប្រទេសបារាំង ហើយផ្តល់ឲ្យកីឡាករ ដែលបង្ហាញទម្រង់លេងល្អបំផុត ប្រចាំឆ្នាំនីមួយៗ និងទទួលបានសំឡេងគាំទ្រខ្ពស់ដាច់គេ ពីស្ថាប័នអ្នកសារព័ត៌មានទូទាំងសកលលោក។ តើអ្នកមានឆ្ងល់ទេថា ពានរង្វាន់ល្បីល្បាញម្លឹងៗ ចុះសម្រាប់កីឡាករដែលជាម្ចាស់ពាន អាចទទួលបានប្រាក់រង្វាន់ប៉ុន្មានទៅ?
ចម្លើយងាយយល់ France Football ពុំមានគោលការណ៍ផ្តល់ប្រាក់រង្វាន់សូម្បីតែមួយសេន្ត សម្រាប់អ្នកឈ្នះពាន ផ្ទុយទៅវិញ ចក្ខុវិស័យតាំងពីឆ្នាំ ១៩៥៦ គឺលើកតម្កើនឲ្យពានរង្វាន់នេះ ឲ្យមានគេទទួលស្គាល់ទូទាំងសកលលោក ហើយអ្វីដែលកីឡាករទទួលបាន គឺត្រឹមពានរង្វាន់កិត្តិយស ដែលជាពានមានទម្រង់ដូចបាល់មាសមួយគ្រឿងតែប៉ុណ្ណោះ។ រួចបើតាមដឹងកញ្ចប់ចំណាយលើការផលិតពាននេះឡើង គឺចាយអស់ជាង ៣ ពាន់ដុល្លារ។
ប៉ុន្តែ កីឡាករដែលឈ្នះពាន មានមធ្យោបាយអាចទាញចំណូលធំ ២ ពីពានរង្វាន់ Ballon d’Or ដោយទី ១) គឺដាក់លក់ដេញថ្លៃពានដែលខ្លួនទទួលបានទៅក្នុងគោលបំណងណាមួយ និងទី ២) អាចទទួលបានប្រាក់ឧបត្ថម្ភបន្ថែម ឬប្រាក់ Bonus ពីសំណាក់ក្លឹបអាណាព្យាបាល ផ្អែកទៅតាមកិច្ចព្រមព្រៀងដែលបានចរចាមុនការផ្ទេរសម្រេច។
មានន័យថា កីឡាករម្នាក់ មុនផ្ទេរទៅក្លឹបណាមួយ ក្នុងកិច្ចព្រមព្រៀង ឬយើងហៅថា Clause របស់ពួកគេ មិនមែនផ្តោតតែលើតម្លៃពលកម្មមួយមុខទេ ទៀតសោតក៏រួមបញ្ចូលទាំងប្រាក់ឧបត្ថម្ភ សម្រាប់កីឡាករណា ដែលអាចសម្រេចសមិទ្ធផលដល់កម្រិតណាមួយ ដូចបានកំណត់។
ជាក់ស្តែងដូចករណីកីឡាករអាហ្សង់ទីន Lionel Messi ក្នុងកិច្ចព្រមព្រៀងជាមួយក្លឹប PSG ក៏មានលក្ខខណ្ឌ Ballon d’Or Clause ផងដែរ ដូចគ្នានឹងកាលនៅក្លឹបចាស់ Barcelona។ យើងត្រលប់ទៅកាលពីឆ្នាំ ២០១៩ តារាឆ្នើមខាងលើ ទទួលបានប្រាក់ឧបត្ថម្ភពីក្លឹបនៅតំបន់កាតាឡូញ៉ា ដល់ទៅ ១,២ លានដុល្លារ ក្រោយក្លាយជាម្ចាស់ពាន Ballon d’Or។
Clause បែបនេះ មិនមែនតែសម្រាប់ Messi ម្នាក់ទេ តួយ៉ាងដូចម្ចាស់ពានជំនាន់ឆ្នាំ ២០១៨ គឺ Luka Modric និងជំនាន់ឆ្នាំ ២០១៧ គឺ Cristiano Ronaldo សុទ្ធសឹងអាចទទួលបាន ១,២ លានដុល្លារ ដែលជាប្រាក់ឧបត្ថម្ភបន្ថែម។ ប៉ុន្តែសម្រាប់ Neymar ដែលនៅក្លឹប PSG គឺអាចបានច្រើនជាងគេបន្តិច ដោយខាងក្លឹបបារាំង សន្យានឹងព្រមផ្តល់ឲ្យ ៣,៥ លានដុល្លារឯណោះ ស្របពេល Kylian Mbappe បានតែ ៥៦៥ ០០០ ដុល្លារ។
បន្ថែមពីនេះ Ballon d’Or Clause មិនមែនតែអាចដំណើរការទៅបាន ជាមួយការចរចារវាងភាគីក្លឹប&កីឡាករនោះទេ ទៀតសោតក៏អាចកើតឡើងទៅបាន រវាងភាគីក្រុមហ៊ុនជាម្ចាស់ឧបត្ថម្ភ ដូចជាយីហោ Nike, Adidas និង Puma ផងដែរ។
ចម្លើយសរុបមកវិញ សម្រាប់ Lionel Messi នៅឆ្នាំ ២០២១ ដែលជាពាន Ballon d’Or លើកទី ៧ គឺគេអាចទទួលបានចន្លោះពី ៣,៤ ទៅ ៥,៧ លានដុល្លារ ដោយនេះរាប់ទាំងការប៉ាន់ប្រមាណ នូវទំហំប្រាក់ឧបត្ថម្ភចេញពីក្រុមហ៊ុន Adidas មួយតង់ផ្សេងទៀត៕
ប្រភព៖ បរទេស