សម្រាប់ការប្រកួតជម្រុះ World Cup នារីនៅតំបន់អឺរ៉ុបយប់មិញនេះ ក្រុមជម្រើសជាតិនារីអង់គ្លេស ពិតជាបង្ហាញសាច់ដុំធំមែន ដោយយកឈ្នះលើក្រុមឡាត់វីបានក្នុងលទ្ធផល ២០-០ ឯណោះ។
អង់គ្លេសជាក្រុមខ្លាំងមួយសម្រាប់ផ្នែកកីឡាបាល់ទាត់នារី តែសម្រាប់ក្រុមឡាត់វី ជាក្រុមខ្សោយបំផុតមួយនៅអឺរ៉ុបហើយ។ ប្រកួតជម្រុះតាមពូលនៅយប់មិញនេះ អង់គ្លេសហាក់មិនប្រណីអ្វីឡើយ ដោយពួកគេស៊ុតបង្កើតប្រវត្តិសាស្ត្រតែម្ដង ដោយរកបាន២០គ្រាប់ឯណោះ។ នេះជាជ័យជម្នះយ៉ាងធំធេងបំផុតហើយសម្រាប់អង់គ្លេស។ ដោយស្ថិតិក្នុងការប្រកួតនេះ ស៊ុតចេញ៦៣ជើង ចំគោលដៅ៣០ជើង និងគ្រប់គ្រងបាល់៨៦%។
ខណៈដែលកន្លងមក ក្រុមអង់គ្លេសនេះដែរ ក៏ទើបតែយកឈ្នះលើក្រុមឡាត់វីនេះបាន ១០-០ ដែរ។ ក្នុងពូល អង់គ្លេសយកឈ្នះលើដៃគូច្រើនៗគ្រាប់ណាស់ដូចជាឈ្នះម៉ាសេដូនៀ ៨-០ ឈ្នះលុចសំបួរ ១០-០ និងឈ្នះអៀរឡង់ខាងជើង ៤-០៕ប្រភព Goal
