ក្នុងនាមជាកីឡាករបាល់ទាត់លំដាប់កំពូល ក៏ដូចជាបុគ្គលល្បីលំដាប់ពិភពលោកមួយរូប វាជារឿងធម្មតាហើយ សម្រាប់ Cristiano Ronaldo ដែលទៅណាមកណា តែងតែមានអង្គរក្សជាប់ខ្លួន ក្នុងគោលបំណងការពារសុវត្ថិភាព ទាំងសម្រាប់លោកផ្ទាល់ និងក្រុមគ្រួសារ។
ក្រោយការផ្ទេរមកក្លឹបថ្មី Manchester United នៅឯទឹកដីចក្រភពអង់គ្លេស គ្រប់គ្នាបានចាប់អារម្មណ៍ច្រើន ទៅលើអង្គរក្ស ២ រូប ដែលមានមុខមាត់ដូចជាកូនភ្លោះ ហើយតែងតែរំលេចវត្តមាននៅក្បែរ CR7 ជាប់ជានិច្ចនៅតាមទីសាធារណៈ ក៏ដូចជានៅកម្មវិធី និងព្រឹត្តិការណ៍នានា។ តើអ្នកដឹងទេថា អង្គរក្សទាំង ២ រូបនោះ មានអត្តសញ្ញាណពិសេសអ្វីខ្លះ ទើបអាចមកបម្រើការឲ្យកំពូលកីឡាករដូចជា Ronaldo បាន ហើយក្នុងមួយខែៗពួកគេអាចទទួលបានចំណូលប៉ុន្មានដែរពីការងារនោះ?
បើតាមសារព័ត៌មាន The Sun បានទម្លាយចេញនូវអត្តសញ្ញាណមួយចំនួន ដោយចុះផ្សាយថា អង្គរក្សទាំងពីរ គឺជាបងប្អូនភ្លោះនឹងគ្នា ដោយមានឈ្មោះ Sergio និង Jorge Ramalheiro ជាជនជាតិអាហ្វហ្គានីស្ថាន។ ប្រភពជិតស្និទ្ធមួយបានទម្លាយថា៖ “អ្នកទាំងពីរស្លៀកពាក់មើលទៅធម្មតា ប៉ុន្តែនិយាយពីសមត្ថភាព គឺពិតជាមិនណយ ដោយមានការគិតយ៉ាងរហ័ស ហើយធ្វើការសម្រេចចិត្តលឿនៗ មិនបង្អង់យូរទេ ប្រសិនមានហេតុការណ៍អ្វីមួយនៅក្នុងហ្វូងមនុស្សជាច្រើន”។
Sergio និង Jorge ធ្លាប់ជាផ្នែកនៃអង្គភាពកងកម្លាំងពិសេសក្នុងប្រទេសអាហ្វហ្គានីស្ថាន មុនបន្តទៅបម្រើការជាអង្គភាពប៉ូលិសនៅឯប្រទេសព័រទុយហ្គាល់ ទទួលបន្ទុកតាមការពារអ្នកនយោបាយ និងចៅក្រម។
ក្រោយមកពួកគេក៏ឈប់បម្រើការ នៅអង្គភាពប៉ូលិស ហើយមកប្រែក្លាយជាអង្គរក្សផ្ទាល់ខ្លួនឲ្យតារាឆ្នើម Ronaldo។ គ្រប់ពេលវេលាទាំងអស់ មិនថាតែដំណើរកម្សាន្តលក្ខណៈគ្រួសារ ការងារ ជំនួញរកស៊ីធំតូច ទីណាមាន Ronaldo ទីនោះតែងតែមានបងប្អូនភ្លោះទាំងពីរជាប់ជានិច្ច។
ជាក់ស្ដែងដូចពេលមួយនោះ Ronaldo ដែលជាចៅហ្វាយនាយ បានជិះរថយន្ត Bentley មកទីលានហ្វឹកហាត់ ហើយគេក៏ប្រទះឃើញបងប្អូនភ្លោះទាំងពីរដែលជាអង្គរក្ស បានជិះរថយន្ត Rang Rover មកតាមក្រោយជាប់ជានិច្ច។ ដូចគ្នាទៅនឹង ការធ្វើដំណើរតាមរយៈជើងហោះហើរទៅចូលរួមការ ប្រកួត Champions Leagueនៅទឹកដីប្រទេសស្វីស ក៏ពួកគេមានភារកិច្ចត្រូវទៅតាមផងដែរ។
បើនិយាយពីប្រាក់ឈ្នួល ដែលអង្គរក្សទាំងពីរខាងលើទទួលបាន គឺមិនមានប្រភពច្បាស់ការណាមួយទម្លាយចេញនោះទេ មិនថាតែកាសែត MARCA របស់អេស្ប៉ាញ ឬ The Mirror របស់អង់គ្លេស ក៏ពុំមានការចុះផ្សាយនោះដែរ តែអ្វីដែលយើងអាចចែករំលែកទៅកាន់អ្នកគាំទ្របាន គឺទំហំប្រហាក់ប្រហែលនៃប្រាក់ខែរបស់អង្គរក្សចាស់ដែល Ronaldo ធ្លាប់ជួលកាលពីមុន។
នោះគឺមានន័យថា ប្រសិនជា Ronaldo អាចផ្តល់ឲ្យអ្នកទាំងពីរប្រហាក់ប្រហែលនឹងអ្នកចាស់ គឺក្នុងមួយឆ្នាំ ពួកគេ អាចទទួលបានជាង ១ លានដុល្លារ ឬល្បាក់ ១០០ ០០០ ទៅ ១២៥ ០០០ ដុល្លារ/ខែ សម្រាប់អង្គរក្សម្នាក់។ ដូច្នេះបើបូកថ្លៃឈ្នួលអង្គរក្សទាំងពីរបញ្ចូលគ្នា ១ ខែនៃការចំណាយនោះ គឺស្មើនឹង ១ ភាគ ១០ នៃប្រាក់ឈ្នួលក្នុងមួយខែរបស់ Ronaldo នៅក្លឹប Man Utd៕
ហាមដាច់ខាតក្នុងការយកអត្ថបទពី CTS Sports ទៅចែកចាយលើគេហទំព័របន្ត ឬផលិតជាវីដេអូផ្សេងៗ