គម្រោងសាងសង់សាលារៀនបន្ទាយស្លឹក ដើម្បីជួយដល់ក្មេងៗខ្វះខាតឲ្យទទួលបានការសិក្សាពេញលេញ នៅរយៈពេលចុងក្រោយ គេឃើញថាមានការខ្នះខ្នែងចូលរួមជួយពីសប្បុរសជនគ្រប់មជ្ឈដ្ឋាន។
បញ្ជាក់ថា សាលារៀនបន្ទាយស្លឹក មានទីតាំងស្ថិតនៅភូមិបន្ទាយស្លឹក ឃុំជ័យជោគ ស្រុកបូរីជលសា ខេត្តតាកែវ។ មធ្យោបាយធ្វើដំណើរទៅទីនោះ គឺមានការលំបាក ដោយសារជួនខ្លះត្រូវជិះទូក ព្រោះតំបន់នោះរមែងលិចទឹក ៦ ខែ គោក ៦ ខែ ហើយសភាពសាលារៀនក៏ទ្រុឌទ្រោម រៀនដោយពឹងផ្អែកលើអាកាសធាតុ បន្ទប់សិក្សាតិច រាល់ពេលបង្រៀន គឺទាមទារមានបែងចែកវេនថែមទៀត។
ទស្សនាទិដ្ឋភាពសាលារៀនបន្ទាយស្លឹក ដែលកំពុងទ្រុឌទ្រោម៖
បើតាមការរៀបរាប់ពី លោក ចន ជីវ័ន្ត អ្នកអធិប្បាយបាល់ទាត់លើទំព័រ CTS Sports បានឲ្យដឹងថា៖ “ការចូលរួមជួយសារនេះ ដោយមានការទទូចស្នើសុំពីក្រុមយុវជនសកម្មស្ម័គ្រចិត្តប្រចាំភូមិ ហើយបែងចែកជា ២ គម្រោង គឺមួយជួយចែកជាសម្ភារៈសិក្សាថ្នាំពេទ្យអង្ករ និងអាហារ ហើយគម្រោងទី ២ សាងសង់សាលារៀនថ្មី ២ បន្ទប់ទៅដល់ក្មេងៗដែលត្រូវសិក្សា ក៏ដោយសារតែមើលឃើញសភាពសាលារៀនមើលទៅទ្រុឌទ្រោម មិនមានទាំងបង្គន់ ហើយថ្នាក់រៀនខ្លះគ្មានទាំងជញ្ជាំងបិទបាំងថែមទៀត”។
ជុំវិញគម្រោងការងារសប្បុរសធម៌ខាងលើ ក៏ទទួលបានការគាំទ្រយ៉ាងពេញទំហឹងពីសំណាក់ព្រះបញ្ញាមុនីញាណ ហាក់ សៀងហៃ ដែលព្រះអង្គបានចូលរួមជួយនូវទឹកប្រាក់ ២៥០ ដុល្លារ តាមរយៈ Admin ជីវ័ន្ត នៃក្រុមការងារ CTS Sports។ សរុបទឹកប្រាក់ដែល Admin ជីវ័ន្តទទួលបានគិតត្រឹមថ្ងៃទី ២៧ វិច្ឆិកា គឺមាន ៧៣៩,៩៣ ដុល្លារ។
ដោយឡែកសម្រាប់បងប្អូន ឬសប្បុរសជនដែលចង់ចូលរួមជួយ ក៏នៅតែបន្តអាចធ្វើបាន រហូតដល់ចុងខែធ្នូ ឆ្នាំ ២០២១ មុនគម្រោងសាងសង់លេចចេញជារូបរាងនៅកំឡុងខែមករា ឆ្នាំ ២០២២។ អ្នកអាចចូលរួមបរិច្ចាគតិចក្តីច្រើនក្តី តាមរយៈគណនីធនាគាររបស់ Admin ជីវ័ន្ត ដោយតាមគណនី ABA៖ 000865816 និងគណនីអេស៊ីលីដា៖ 017276556 ។
គួរឲ្យដឹងថា កន្លងមកព្រះអង្គ ហាក់ សៀងហៃ ដែលជានាយកប្រតិបត្តិអង្គការពុទ្ធសាសនា ដើម្បីអប់រំនៃកម្ពុជា និងជាទីប្រឹក្សាក្រុមប្រឹក្សាជាតិភាសាខ្មែរពីរាជបណ្ឌិតសភាកម្ពុជា ក៏បានគាំទ្រយ៉ាងខ្លាំងផងដែរ ទៅលើយុទ្ធនាការរបស់ក្រុមការងារ CTS Sports ជុំវិញការជំរុញបងប្អូនអ្នកប្រើប្រាស់បណ្តាញសង្គម ឲ្យចូលរួមសរសេរអក្សរខ្មែរឲ្យបានត្រឹមត្រូវ និងបញ្ចៀសការសរសេរអក្សរឡាតាំងសំនៀងខ្មែរ៕