កាលពីអត្ថបទមុន CTS Sports ធ្លាប់បានលើកមកបង្ហាញម្តងរួចមកហើយ ជុំវិញការកោតសរសើរទៅលើ Lionel Messi ពីសំណាក់អ្នកចាត់ការក្លឹបគូប្រជែង និងខ្លះជាគ្រូរបស់ Ronaldo។ ដោយឡែកងាកមកអត្ថបទនេះ យើងបញ្ច្រាសគ្នាពីគ្រូរបស់ Messi ៣ រូប ដែលធ្លាប់សរសើរតារាឆ្នើម CR7 វិញម្តង៖
៣) Ernesto Valverde
ជាអតីតអ្នកចាត់ការ Barcelona ដែលធ្លាប់ដឹកនាំក្លឹប ឈ្នះពាន La Liga រដូវកាល ២០១៨/១៩ ហើយក៏ធ្លាប់ដឹកនាំ Athletic Bilbao លើកពាន Supercopa de Espana នៅឆ្នាំ ២០១៥ ផងដែរ។
និយាយពីការតតាំងទល់ Cristiano Ronaldo ក្រុមដឹកនាំដោយ Valverde ពិតណាស់ គឺបានជួបច្រើនសារហើយ តែយ៉ាងណាអ្នកចាត់ការសញ្ជាតិអេស្ប៉ាញក៏មិនលាក់បាំងនោះដែរ ពីអារម្មណ៍ពេញចិត្តទៅលើគុណភាពរបស់កីឡាករព័រទុយហ្គាល់។
Valverde ធ្លាប់និយាយថា៖ “Ronaldo គេអាចរកបាន ៣ ឬ ៤ គ្រាប់រៀងរាល់ការប្រកួត ហើយគេតែងតែស្រេកឃ្លានការរកគ្រាប់បាល់ ដោយយោបល់អ្នកផ្សេងខ្ញុំមិនដឹងទេ តែសម្រាប់ខ្ញុំ ឲ្យតែលេងតតាំង Ronaldo នោះគឺជាពេលវេលាដែលតែងតែគ្រោះថ្នាក់បំផុត”។
២) Pep Guardiola
គ្រប់ក្លឹបដែល Pep Guardiola ដឹកនាំ មិនថាតែ Bayern Munich, Barcelona និងមកដល់ Man City ចុងក្រោយនេះ គឺសុទ្ធតែធ្លាប់ប្រកួតប៉ះតារាឆ្នើមវ័យ ៣៦ ឆ្នាំ។
រាប់ការប្រកួតធំៗ លោកធ្លាប់ដឹកនាំ Barcelona យកឈ្នះទៅលើ Man Utd ដែលមាន Ronaldo នៅវគ្គផ្តាច់ព្រ័ត្រ UCL ឆ្នាំ ២០០៩ មួយសារដែរ តែពេល Ronaldo មកដល់ Real Madrid គឺមានឱកាសសងសឹកទៅលើក្រុមលោក Pep វិញ គ្រាទម្លាក់ Bayern Munich នៅវគ្គ ៤ ក្រុម កាលពីឆ្នាំ ២០១៤។
យ៉ាងណាក្នុងនាមជាគ្រូជោគជ័យមួយរូប Guardiola ក៏ធ្លាប់បានលាន់មាត់សរសើរដល់កីឡាករព័រទុយហ្គាល់បែបនេះថា៖ “Ronaldo គេនឹងនៅតែអាចរកបានគ្រាប់បាល់រហូតទៅ ហើយសង្ស័យប្រហែលដល់អាយុ ៧៥ ឆ្នាំ ទើបគេព្រមចូលនិវត្ត ដោយកីឡាករដូចជា Ronaldo ដូចជា Messi នេះ គឺពិតជាអស្ចារ្យខ្លាំងក្នុងរយៈពេលមួយទសវត្សចុងក្រោយ”។
១) Mauricio Pochettino
អ្នកចាត់ការរួមសញ្ជាតិអាហ្សង់ទីន និងជាគ្រូបច្ចុប្បន្នរបស់ Lionel Messi ក៏ធ្លាប់បានសរសើរ Ronaldo ម្តងដែរ កាលពីឆ្នាំ ២០១៧ គ្រាក្លឹប Spurs លេងតតាំង Real Madrid នៅវគ្គចែកពូល UCL។
កាលនោះ Pochettino និយាយថា៖ “Ronaldo គឺជាមនុស្សដ៏អស្ចារ្យ ហើយគេសក្តិសមនឹងទទួលបានងារជាកីឡាករល្អបំផុត រីឯគុណភាពរបស់គេក្នុងនាមជាកីឡាករ គឺសក្តិសមជាអ្វីដែលគ្រប់គ្នាគួរយកគំរូតាម”។
គួររំឭកថា ក្នុងអាជីពរបស់ Cristiano Ronaldo សរុបការបង្ហាញខ្លួន ទាំងក្លឹបបូកជម្រើសជាតិគឺមាន ១០៩៣ ប្រកួត ហើយរកបាន ៧៩៩ គ្រាប់ និង AssistS ៣៤៦ លើក៕