ខ្សែបម្រើក្លឹប Lille គឺកីឡាករ Renato Sanches បាននឹងកំពុងផ្តល់ក្តីសង្ឃឹមដល់ក្លឹបហង្សក្រហម Liverpool និងកាំភ្លើងធំ Arsenal ក្រោយគេបោះពាក្យមកថា គេត្រៀមខ្លួននឹងបោះជំហានទៅកាន់ដំណាក់កាលបន្ទាប់ក្នុងអាជីព ពោលគឺបើកចិត្តទទួលយកសំណើពីក្លឹបណាមួយនៅពេលខាងមុខ។
កីឡាករព័រទុយហ្គាល់ សព្វថ្ងៃគេនៅសេសសល់កុងត្រាជាមួយក្លឹបម្ចាស់ជើងឯក Ligue 1 ដល់ចុងខែមិថុនា ឆ្នាំ ២០២៣ ហើយមួយរយៈចុងក្រោយក៏លឺថាក្លឹបនៅអង់គ្លេស និងមួយចំនួនទៀតនៅតំបន់អឺរ៉ុបចាប់អារម្មណ៍មកលើគេផងដែរ។
និយាយប្រាប់សារព័ត៌មាន L’Equipe ខ្សែបម្រើ Sanches ថា៖ “ពេលខ្ញុំទៅដល់ Bayern ដំបូង ខ្ញុំអត់ទាន់ត្រៀមខ្លួនរួចរាល់ទេ កាលនោះនៅក្មេងពេល ហើយដល់តែពេលខ្ញុំត្រៀមខ្លួនរួចរាល់ ឱកាសក៏បែរជាមិនមានទៅវិញ ក្នុងការលេងឲ្យក្លឹបនោះជាថ្មី តែពេលនេះ ខ្ញុំក៏មានអារម្មណ៍ថាខ្លួនឯងត្រៀមខ្លួនរួចរាល់ហើយ ដោយខ្ញុំយល់ពីបាល់ទាត់កាន់តែច្បាស់”។
លោកបន្ត៖ “ខ្ញុំមានបទពិសោធន៍ច្រើនជាងមុនបន្ថែម ហើយប្រហែលជាមានក្លឹប Milan និង Arsenal ដែលចាប់អារម្មណ៍មកលើខ្ញុំ តែខ្ញុំអត់ដឹងច្បាស់ទេ គ្រាន់បាននិយាយទៅកាន់ភ្នាក់ងារហើយ ថាបើមានក្លឹបណាចង់បាន ខ្ញុំនឹងធ្វើការសម្រេចចិត្ត ដោយស្វែងរកកន្លែងដែលល្អបំផុតមួយ”៕
ប្រភព៖ L’Equipe