ក្លឹបយក្ស Barcelona ត្រៀមនឹងសម្រេចចិត្តផ្តាច់កុងត្រា ដកកីឡាករលេងតំណែងការពារ Samuel Umtiti ចេញពីក្លឹបនៅពេលខាងមុខ បន្ទាប់ពីភាគីក្លឹបនិងកីឡាករចរចាមិនត្រូវរ៉ូវ លើសំណើឲ្យគេព្រមកាត់ថ្លៃពលកម្ម លើប្រាក់សប្តាហ៍ចាស់ ២០៨ ០០០ ផោន។
ដោយសារក្លឹបជួបបញ្ហាវិបត្តិហិរញ្ញវត្ថុ ហើយកីឡាករជាច្រើនក៏បានព្រមព្រៀងកាត់បន្ថយថ្លៃពលកម្ម ខ្លះ ១០ ភាគរយ ខ្លះ ៣០ ភាគរយ ទៅតាមការចរចាដោយផ្ទាល់ តែយ៉ាងណាកីឡាករបារាំង Umtiti មិនទាន់សម្រេចលើសំណើខាងលើនៅឡើយ។
ប្រភពពីសារព័ត៌មានអេស្ប៉ាញ Sport ចុះផ្សាយថា ប្រសិន Umtiti នៅតែមិនយល់ព្រម នោះភាគីក្លឹបម្ចាស់ដី Camp Nou នឹងសម្រេចផ្តាច់កុងត្រាគេមុនកាលកំណត់ហើយ ដោយមានហេតុផលថា Umtiti ស៊ីថ្លៃពលកម្មខ្ពស់ តែលេងមិនកើតលើទីលាន។
បញ្ជាក់ថា Umtiti នៅសេសសល់សុពលភាពកុងត្រាដល់ចុងខែមិថុនា ឆ្នាំ ២០២៣។ គេត្រូវបានក្លឹប Barca ទិញចេញពី Lyon នៅតម្លៃ ២០ លានផោនកាលពីឆ្នាំ ២០១៦។ យ៉ាងណាក្រោមការដឹកនាំរបស់ Ronald Koeman ហើយឥឡូវចូលមកដល់ Xavi ជាគ្រូថ្មី គេនៅតែមិនសង្ឃឹមអាចទទួលបានការជឿទុកចិត្តពីគ្រូដដែល៕
ប្រភព៖ Sport