អតីតកីឡាករនៅក្លឹប Barcelona គឺ Lionel Messi ត្រូវបានគេរាយការណ៍ថា នឹងគ្មានបំណងវិលត្រលប់ទៅកាន់ក្លឹបចាស់របស់គេវិញទេនៅពេលខាងមុខ មិនថាក្នុងនាមជាកីឡាករ ឬជាតំណែងណាមួយឡើយ។ នេះបើតាមសារព័ត៌មាន AS បានចុះផ្សាយ។
ប្រភពបានឲ្យដឹងថា បើទោះបី ជា Messi កំពុងចាប់ផ្តើមអាជីពថ្មីនៅ PSG មិនទាន់ឃើញផ្លែផ្កាជាដុំកំភួន តែគេបានសម្រេចចិត្តច្បាស់លាស់ហើយ ថានឹងបន្តរួមរស់នៅក្លឹបបារាំង ហើយផ្តោតតែលើអាជីពបច្ចុប្បន្នមួយប៉ុណ្ណោះ។ នេះជាការឆ្លើយតប ក្រោយលោក Joan Laporta ជាប្រធានក្លឹប បានអះអាងអំពីលទ្ធភាព ដែល Andres Iniesta និង Lionel Messi អាចនឹងដើរតាមគន្លងរបស់ Dani Alves ត្រលប់មក Camp Nou។
ជាងនេះ Messi កំពុងដាក់គោលដៅ ប្រជែងយកពានរង្វាន់ធំ ជាមួយក្លឹបដឹកនាំដោយអ្នកចាត់ការលោក Mauricio Pochettino ហើយអ្វីដែលសំខាន់ គឺគ្រួសាររបស់លោកសព្វថ្ងៃ ក៏សម្របនឹងការរស់នៅក្នុងទីក្រុងប៉ារីសហើយដែរ ដូច្នេះមិនចង់ឲ្យមានការវិលត្រលប់ទៅកន្លែងចាស់វិញអ្វីឡើយ៕
ប្រភព៖ AS