កីឡាករលេងតំណែងប្រយុទ្ធឲ្យក្លឹប Man City គឺ Raheem Sterling ត្រូវបានគេរាយការណ៍ថា បានជូនដំណឹងទៅកាន់ក្លឹបអាណាព្យាបាលរបស់គេហើយ អំពីទ្រនំបន្ទាប់ដែលគេចង់ទៅចូលរួម ក្រោយពីខ្សត់ឱកាសការលេងនៅក្លឹបបច្ចុប្បន្ន។
កីឡាករអង់គ្លេសមិនសូវបានលេងជាប់លាប់នោះទេ ក្រោមការដឹកនាំរបស់លោក Pep Guardiola ហើយអ្នកចាត់ការ City ក៏និយាយដែរថា ដោយសារកីឡាករមានច្រើន ដូច្នេះលោកមិនដឹងធ្វើបែបណាឡើយ ដោយមានតែមើលតាមគុណភាពរបស់កីឡាករផ្ទាល់។
តាមសារព័ត៌មាន 90Min ចុះផ្សាយថា Sterling បានជូនដំណឹងទៅ Man City ហើយថានៅរដូវរងា ឬដើមខែមករា ឆ្នាំ ២០២២ ខាងមុខ គេចង់ទៅចូលរួមនៅក្លឹប Barcelona ក្នុងលក្ខខណ្ឌខ្ចីជើង ហើយពេលបន្ទាប់ ចាំគិតទៀត ថាគួរផ្ទេរចេញពេញថ្លៃឬបែបណា។ ខាងក្លឹបមេឃខៀវ អាចនឹងព្រមក្នុងការអនុញ្ញាតឲ្យ Sterling ចាកចេញទៅក្លឹបម្ចាស់ដី Camp Nou តែបើការផ្ទេរទៅក្លឹប Liverpool គឺមិនព្រមឡើយ។
គួររំឭកថា Sterling នៅរដូវកាល ២០២១/២២ គេបង្ហាញខ្លួនសរុបទើបតែ ៦ ប្រកួត រកបាន ២ គ្រាប់និង Assist ២ លើក។ បើនៅ Premier League វិញ គេជាប់ជម្រើសដំបូង ទើបតែបាន ៣ ប្រកួតប៉ុណ្ណោះ៕
ប្រភព៖ 90Min