ខ្សែប្រយុទ្ធឆ្នើមក្លឹប Barcelona គឺកីឡាករ Sergio Aguero មិនទាន់បានបង្ហាញខ្លួន បង្កើតផ្លែផ្កាជោគជ័យជាដុំកំភួនឲ្យក្លឹបផង ឥឡូវបែរជាទទួលដំណឹងថា អាចចូលនិវត្តបាត់ទៅហើយ ក៏ដោយសារបញ្ហានៃជំងឺបេះដូង។
ខ្សែប្រយុទ្ធអាហ្សង់ទីន បានជួបបញ្ហាថប់ដង្ហើមកំឡុងការប្រកួត ហើយត្រូវបង្ខំចិត្តដើរចេញពីទីលាន នៅជំនួបទល់ Alaves កាលពីខែមុន ហើយលឺថាអាចត្រូវសម្រាកព្យាបាលរយៈពេល ៣ ខែ។ យ៉ាងណាតាមការអាប់ដែតចុងក្រោយ ស្ថានភាពរបស់កីឡាករវ័យ ៣៣ ឆ្នាំ ប្រហែលធ្ងន់ធ្ងរជាងការគ្រោងទុក ហើយទំនងជាបង្ខំឲ្យលោកត្រូវចូលនិវត្តត្រឹមប៉ុណ្ណឹងហើយ។
បើតាមការចុះផ្សាយពីអ្នកសារព័ត៌មាន Gerard Romero បញ្ជាក់ថា៖ “Kun Aguero សម្រេចចូលនិវត្តហើយ បញ្ហាបេះដូងរបស់គេ គឺត្រូវបង្ខំចិត្តឲ្យគេចាកចេញពីអាជីពបាល់ទាត់ ហើយសប្តាហ៍ក្រោយ នឹងមានសន្និសីទផ្លូវការមួយប្រកាស ពីការដកខ្លួនចេញរបស់គេ”។ បញ្ជាក់ថា Aguero ធ្លាប់ជាកីឡាករជោគជ័យខ្លាំងកាលនៅ City បង្ហាញខ្លួន ៣៩០ ប្រកួត រកបាន ២៦០ គ្រាប់ ហើយនៅជម្រើសជាតិរកបាន ៤១ គ្រាប់នៅការបង្ហាញខ្លួន ១០១ ប្រកួត៕
ប្រភព៖ Twitter