លោក Maurizio Sarri អ្នកចាត់ការក្រុម Chelsea មើលឃើញថាក្រុមរបស់ខ្លួននៅមានចំណុចខ្សោយច្រើនណាស់ ហើយត្រូវការពេល១ឆ្នាំទៀត ទើបអាចលេងបានល្អដូចក្រុម Liverpool ។
តោខៀវ Chelsea លេងបានត្រឹមស្មើ West Ham ០-០ ប៉ុណ្ណោះ កាលពីយប់មិញនេះ។ ដោយការស្មើនេះទៀតសោត បានធ្វើឱ្យពួកគេធ្លាក់ចេញពីកំពូលតារាងលីគអង់គ្លេសហើយ ដោយឡើងជំនួសវិញដោយក្រុម Liverpool ដែលមិនទាន់ស្គាល់ពាក្យថាចាញ់ឬស្មើសោះនៅរដូវកាលនេះ។
ចំពោះការបាត់តំណែងកំពូលតារាងនេះដែរ លោក Sarri ដែលជាអ្នកចាត់កាក្រុម Chelsea បាននិយាយថា៖ “Liverpool កំពុងនៅមុខយើងនៅពេលនេះ។ ពួកគេកំពុងស្ថិតនៅក្រោមការដឹកនាំរបស់គ្រូបង្វឹកច្រើនឆ្នាំមកហើយ។ ពួកគេយល់ចិត្តគ្នាច្បាស់។ តែយើងវិញទើបបានធ្វើការជាមួយគ្នា៤០ថ្ងៃប៉ុណ្ណោះ ហើយ១០ថ្ងៃហើយដែលយើងសម្រាកទៀត។ បើចង់ឱ្យយើងលេងល្អដូចគេ ទាល់តែប្រើពេល១ឆ្នាំទៀត”៕ប្រភពDailyMail