អ្នកចាត់ការជាច្រើននៅពេលបច្ចុប្បន្ន ខ្លះបើទោះបីស៊ីថ្លៃវាល់លាន មានសមត្ថភាព បទពិសោធន៍ដឹកនាំជាហូរហែក៏ដោយ តែមុននិងក្រោយក៏នៅតែមានថ្ងៃ ដែលត្រូវបានក្លឹបប្រកាសដកតំណែង ឬបណ្ដេញចេញ មុនផុតកំណត់ត្រាកុងត្រា។
និយាយដល់ឈ្មោះ គ្រូបង្វឹកធ្លាប់ត្រូវបានក្លឹបដកតំណែងច្រើនបំផុត តួយ៉ាងមានដូចជាលោក Jose Mourinho, Roy Hodgson និង Sam Allardyce ជាដើម។ ដោយឡែកបង្វែរមកឈ្មោះកំពូលអ្នកចាត់ការទាំង ៥ រូបនេះវិញ តាំងពីបើកក្បាលអាជីពមកទល់សព្វថ្ងៃ លោកមិនធ្លាប់ត្រូវបានក្លឹបដកតំណែងនោះទេ ផ្ទុយទៅវិញមានតែសុំក្លឹបដើរចេញ ឬឈរជើងដល់អស់សុពលភាពកុងត្រា៖
៥) Didier Deschamps
ជាបុគ្គលមួយក្នុងចំណោម ៣ រូបក្នុងលោក ដែលបានឈ្នះពានរង្វាន់ FIFA World Cup នាមជាកីឡាករនិងអ្នកចាត់ការ។
បុរសវ័យ ៥៣ ឆ្នាំ មិនធ្លាប់ត្រូវបានក្លឹបប្រកាសដកតំណែងនោះទេ ដោយដំបូងបង្អស់ដឹកនាំក្លឹប AS Monaco មុនផ្ទេរទៅដឹកនាំ Juventus និង Marseille ហើយចុងក្រោយនេះ គឺជាមួយជម្រើសជាតិបារាំង។ ដោយសារគុណភាពនិងកេរឈ្មោះដ៏ល្បីល្បាញ រាល់ពេល Deschamps ផុតកុងត្រាម្តងៗ គឺលោកមិនដែលទំនេរជើងយូរឡើយ ហើយតែងត្រូវបានទ្រនំថ្មីផ្តល់ឱកាសឲ្យជារឿយៗ។
៤) Zinedine Zidane
ជាបុរសសញ្ជាតិបារាំងមួយរូបទៀត ដែលជោគជ័យខ្លាំងក្នុងវិស័យដឹកនាំក្លឹបបាល់ទាត់។ ផ្តើមពីតំណែងជាជំនួយការអ្នកចាត់ការ រហូតដល់ថ្ងៃទី ២៦ សីហា ឆ្នាំ ២០១៤ Zidane បានឡើងមកកាន់តំណែងគ្រូធំ នៅ Real Madrid Castilla រហូតដល់ឆ្នាំ ២០១៦ ទទួលបានតំណែងថ្មីនៅឈុតធំ។
Zidane បានសុំក្លឹបដើរចេញដោយខ្លួនឯង កាលពីឆ្នាំ ២០១៨ ហើយបានមកឡើងកាន់តំណែងម្តងទៀតនៅខែឧសភា ឆ្នាំ ២០១៩។ បច្ចុប្បន្នលោកកំពុងទំនេរជើង តែលឺថា អាចត្រៀមក្តោបក្តាប់តំណែងថ្មី គឺរវាងក្លឹប Man Utd ឬជម្រើសជាតិបារាំង។
៣) Diego Simeone
មុនក្លាយជាគ្រូកាន់ឆ្នាំនៅ Atletico Madrid សម្រាប់បុរសសញ្ជាតិអាហ្សង់ទីន Simeone ក៏ធ្លាប់ទទួលរងសម្ពាធមួយសារដែរ កាលនៅដឹកនាំក្លឹប San Lorenzo ចន្លោះឆ្នាំ ២០០៩-១០។
តែពេលនោះ Simeone ជាអ្នកសុំក្លឹបដើរចេញពីតំណែងដោយខ្លួនឯង ហើយក្រោយៗមកដូចជាមួយក្លឹប Racing, Catania គឺមានតែពាក្យថា ជោគជ័យ ជាពិសេសជាមួយក្លឹបអេស្ប៉ាញ At Madrid លោកកំពុងក្លាយជាវីរបុរសក្នុងដួងចិត្តរបស់អ្នកគាំទ្រ ក្រោយដឹកនាំក្លឹបឈ្នះពានរង្វាន់ ៨ លើក រួមទាំងពាន La Liga, Europa League, UEFA Super Cup និងពានតូចៗក្នុងស្រុក។
២) Jurgen Klopp
ជាគ្រូជោគជ័យក្នុងយុគសម័យបាល់ទាត់បច្ចុប្បន្ន ហើយលោកត្រូវបានគេទទួលស្គាល់ខ្លាំង ពីសមត្ថភាពដឹកនាំក្លឹប Liverpool ដែលបានឈ្នះទាំងពាន Premier League និង UEFA Champions League។
បើត្រលប់ទៅក្លឹបចាស់ Dortmund ក៏បានគ្រូសញ្ជាតិអាល្លឺម៉ង់នេះហើយ ជ្រោមជ្រែងឲ្យក្លឹបទទួលបានផ្លែផ្កា និងបានឈ្នះពាន Bundesliga នាចន្លោះឆ្នាំ ២០០៨ ដល់ ២០១៥។ រីឯជាមួយក្លឹប Mainz 05 ក៏ដោយសារវត្តមាន Klopp ដូចគ្នា បានជ្រោមជ្រែងឲ្យក្រុមអាចឡើងមកលេងលីគកំពូលអាល្លឺម៉ង់សារជាថ្មី។
១) Pep Guardiola
រាប់បានជាគ្រូជោគជ័យបំផុត ប្រចាំសតវត្សទី ២១ ដែលបានឈ្នះពានរង្វាន់មិនក្រោម ៣០ ពានឡើយ។ គន្លងនៃអាជីពរបស់ Pep គឺប្រហែល Klopp ដែរ លោកឆ្លងកាត់ដឹកនាំក្លឹបតែ ៣ ទេ មាន Barcelona, Bayern Munich និង Man City។
បុរសសញ្ជាតិអេស្ប៉ាញ បង្កើតផ្លែផ្កាជោគជ័យខ្លាំងកាលនៅ Barcelona ហើយមកដល់ Bayern Munich លោកក៏បានសម្រេចចិត្តចែកផ្លូវមុនអស់កុងត្រា ដើម្បីមកដឹកនាំក្លឹប Man City នៅឆ្នាំ ២០១៦។ ពេលនេះ Pep កំពុងក្លាយជាអត្តសញ្ញាណរបស់មេឃខៀវ បន្ទាប់ពីជួយក្រុមលើកពាន PL ៣ លើក នៅ ៤ រដូវកាលចុងក្រោយ បូកផ្សំនឹងពានតូចក្នុងស្រុកជាហូរហែ៕
ប្រភព៖ Sportskeeda