ក្លឹបកាំភ្លើងធំ Arsenal ត្រៀមនឹងបាត់បង់យុវជន Eddie Nketiah នៅពេលដ៏ខ្លីខាងមុខ ក្រោយពីសាមីខ្លួន បានស្នើទៅក្លឹបអំពីការត្រៀមចែកផ្លូវ បន្ទាប់ពីមិនទទួលបានពេលវេលាលេងគ្រប់គ្រាន់។ នេះបើតាមសារព័ត៌មាន Daily Mail បានចុះផ្សាយ។
ខ្សែប្រយុទ្ធវ័យ ២២ ឆ្នាំ គេសេសសល់កុងត្រាដល់ចុងខែមិថុនា ឆ្នាំ ២០២២ តែលឺថាក្លឹបមួយចំនួននៅអង់គ្លេសក៏ចាប់អារម្មណ៍ចង់បានគេបណ្តើរៗហើយ ត្រឹមខែ មករាខាងមុខ ប្រសិនជាអាចចរចាត្រូវរ៉ូវ គឺយកទៅលេងតែម្តង។ ការបង្ហាញខ្លួននៅ Arsenal សម្រាប់ Nketiah គឺតិចខ្លាំង ដោយ ៣ ប្រកួត រកបាន ២ គ្រាប់ តែគិតជាចំនួនឈរជើង ត្រឹមតែ ២៣៤ នាទីប៉ុណ្ណោះ។
តាមហាងឆេងថ្លៃខ្លួន ក្លឹបដទៃអាចចរចាទិញយកកីឡាករអង់គ្លេសខាងលើ ត្រឹមតម្លៃមិនដល់ ១០ លានផោនទេ សម្រាប់ខែមករាខាងមុខ។ គួរបញ្ជាក់ថា គេជាអតីតយុវជនងើបចេញពីថ្នាលរបស់ Arsenal ផ្ទាល់ ហើយធ្លាប់បានខ្ចីជើងទៅលេងឲ្យ Leeds United កន្លះរដូវកាល មុនត្រលប់មកក្លឹបអាណាព្យាបាល និងឈរជើងទល់សព្វថ្ងៃ៕
ប្រភព៖ DailyMail