ខ្សែប្រយុទ្ធ Lionel Messi បានប្ដូរមុខមាត់ថ្មីទៀតហើយ ដើម្បីត្រៀមការប្រកួតនៅរដូវកាលនេះ ដោយចាប់ផ្ដើមកោពុកមាត់ ពុកចង្កាចេញ ដើម្បីយកហេង។
Barcelona បានយកឈ្នះក្រុម PSV ក្នុងការប្រកួតបើករដូវកាលថ្មី UEFA Champions League ។ ក្រោយពីការប្រកួតនោះចប់ លោក Ernesto Valverde អ្នកចាត់ការក្រុមអ្នកមានបុណ្យបានអនុញាតិឱ្យកីឡាករសម្រាក ហើយទើបតែប្រមូលផ្ដុំប៉ុន្មានថ្ងៃមុននេះទេ។ ក្នុងការប្រមូលផ្ដុំថ្មីនេះដែរ គេសង្កេតឃើញថា Messi បានប្ដូរមាត់ថ្មី ហើយមើលទៅពិតជាសង្ហាជាងមុន គ្រាដែលនៅទុកពុកមាត់។
ខ្សែប្រយុទ្ធជម្រើសជាតិអាហ្សង់ទីនខាងលើបានដាក់គោលដៅរដូវកាលនេះថា នឹងជួយក្រុម FC Barcelona យកពានរង្វាន់ Champions League មកវិញឱ្យបាន ក្រោយពីខកខានមិនឈ្នះ និងត្រូវដៃគូប្រជែង Real Madrid លើកពាន៣ឆ្នាំជាប់គ្នានោះ។ ដោយឡែកនៅលីគ La Liga វិញ ក្រុម Barcelona ក៏កំពុងធ្វើបានល្អដែរ ដោយឈ្នះគ្រប់ប្រកួតតែម្ដង ហើយយប់នេះនឹងត្រូវតតាំងជាមួយក្រុម Girona នៅវេលាម៉ោង១:៤៥នាទីរំលងអាធ្រាត្រ៕ប្រភព៖ MARCA
