Jurgen Klopp អ្នកចាត់ការក្រុម Liverpool បាននិយាយចំពោះទម្រង់លេងរបស់ Mohamed Salah ថា អ្នកគ្រប់គ្នាមិនអាចវាយតម្លៃត្រឹមប៉ុន្មានប្រកួតនេះទេ ពោលគឺត្រូវរង់ចាំរហូតដល់ចប់រដូវកាលសិន ទើបដឹងថាល្អឬមិនល្អ។
Salah ចាប់ផ្ដើមរដូវកាលនេះ មិនល្អឡើយ ដោយទើបតែរកបាន២គ្រាប់ប៉ុណ្ណោះ ក្នុងការបង្ហាញខ្លួនផ្លូវការ៦ប្រកួតគិតគ្រប់ពានរង្វាន់ទាំងអស់ឱ្យ Liverpool ។ ចំពោះរឿងនេះដែរ បានធ្វើឱ្យអ្នកគាំទ្រជាច្រើនដាក់ការសង្ស័យថា ខ្សែប្រយុទ្ធអេហ្ស៊ីបរូបនេះ មិចបានជាល្អបានតែ១រដូវកាលមុន ហើយរដូវកាលនេះធ្លាក់ទម្រង់លេងយ៉ាងនេះទៅវិញ។
លោក Klopp ដែលជាអ្នកចាត់ការផ្ទាល់ក៏បានឃើញចំពោះចំណុចខាងលើដែរ។ ប៉ុន្តែលោកបានបញ្ជាក់វិញថា គ្រប់គ្នាមិនអាចវាយតម្លៃកីឡាករម្នាក់ត្រឹមប៉ុន្មានប្រកួតដើមរដូវកាលនេះទេ។ រូបគេអាចនឹងល្អនៅប្រកួតបន្ទាប់ ឬនៅពេលខាងមុខ។ ដូច្នេះហើយ ប្រសិនបើចង់វាយតម្លៃ Salah ត្រូវរង់ចាំឱ្យចប់រដូវកាលនេះសិន ទើបអាចដឹងច្បាស់។
រំលឹកទៅរដូវកាលមុនបន្តិចថា Salah ជាអ្នករកគ្រាប់បាល់បានច្រើនជាងគេនៅអង់គ្លេស។ដោយគ្រានោះ រូបគេរកបាន៤៤គ្រាប់ ក្នុងការបង្ហាញខ្លួន៥២ប្រកួត៕ប្រភព៖ dailymail