កម្មវិធីប្រកួតប្រដាល់ គុនខ្មែរអលស្តារ បានលើកយកការប្រកួតអំបោះឆៅ ដែលជាទម្រង់ប្រកួតបុរាណរបស់ដូនតាខ្មែរមកបង្ហាញយ៉ាងអស្ចារ្យ កាលពីថ្ងៃទី២៧ ខែតុលាកន្លងទៅ។ កម្មវិធីនេះ ជាការឈានជើងចូលរៀបចំនិងផ្សាយផ្ទាល់ប្រដាល់លើកដំបូងក្នុងរយៈពេល៣០ឆ្នាំចុងក្រោយរបស់ទូរទស្សន៍ជាតិកម្ពុជា។
គុនខ្មែរអលស្តារ បានរៀបចំការប្រកួតចម្រុះ១០គូដែលមាន គុនខ្មែរ ឃីកបុកស៊ីង និងសកល។ នេះរាប់បានថា ជាការប្រមូលផ្តុំក្បាច់គុនច្រើនជាងគេ ក្នុងការរៀបចំ ត្បិតគេឃើញតាមស្ថានីយ៍ទូរទស្សន៍បច្ចុប្បន្នសំបូរតែ គុនខ្មែរ និងយូរៗម្តងមាន សកល ប៉ុណ្ណោះ។
ការប្រើប្រាស់អំបោះឆៅពីរគូដែលជាការជួបគ្នារវាង អេលីត ភក្តី ជាមួយ ធន់ ចាន់តាក់ និងគូឯក ឡៅ ចិត្រា តទល់ ផល សោភ័ណ្ឌ បានធ្វើឲ្យមហាជនសរសើរពីរបត់ថ្មីដែលមានទាំងការរៀបចំបច្ចេកទេសរុំដ៏ល្អពីលោក សួង បញ្ញា។ ចំណែកកម្រិតការប្រកួត ថ្វីបើ អេលីត ភក្តី សន្លប់យ៉ាងលឿន ក៏វាបង្ហាញនូវទឹកចិត្តប្តូរផ្តាច់របស់កីឡាករដោយពុំខ្លាចរអា។ អំបោះឆៅ បានបង្ហាញយ៉ាងច្បាស់ ពីគុណភាព និងហានិភ័យសម្រាប់កីឡាករ ប្រសិនបើធ្លាស់ធ្លោយ។
ក្រោយកម្មវិធី ឡៅ ចិត្រា បានបង្ហាញការពេញចិត្តចំពោះបទពិសោធន៍ថ្មីនេះ នឹងស្នើសុំឲ្យគណៈកម្មការរៀបចំការប្រកួតបែបនេះម្តងទៀត។
ប្រធានសហព័ន្ធប្រដាល់គុនខ្មែរ ឯកឧត្តម តែម ម៉ឺន បានផ្តល់បទសម្ភាសន៍ដល់ ទទក ថា នេះជាប្រវត្តិសាស្ត្រសម្រាប់កីឡាប្រដាល់កម្ពុជា។ លោកបន្ថែមថា កម្មវិធីនេះពិតជាល្អក្នុងការលើកស្ទួយកម្រិតសមត្ថភាព និងជីវភាពកីឡាករ ត្បិតមានតម្លៃខ្លួនខ្ពស់ និងការគាំទ្រច្រើន។
ឯកឧត្តម ខៀវ កាញ៉ារិទ្ធ ដែលអង្គុយទស្សនាការប្រកួតនេះផ្ទាល់ដល់ម៉ោង១២យប់ បង្ហាញឆន្ទៈគាំទ្រយ៉ាងមុតមាំចំពោះកម្មវិធី ក្រោមការគ្រប់គ្រងរបស់ឯកឧត្តម ឃីម វុទ្ធី អគ្គនាយក ទទក។ លោកបន្តថា ជំហានបន្ទាប់ក្រសួងសាទរឲ្យមានការប្រកួតជាប្រចាំសប្តាហ៍តែម្តងនៅ ទទក។
គុនខ្មែរអលស្តារ វគ្គ២បានចំណាយថវិការរៀបចំអស់ប្រមាណ១៤០០០ដុល្លារ ដោយក្នុងនោះ ១០៥០០ដុល្លារទៅលើថ្លៃខ្លួនកីឡាករ និង៤០០០ដុល្លារទៀតលើការរៀបចំ។ ចំណែកកីឡាករប្រកួត ទទួលតម្លៃខ្លួនចាប់ពី ៣៥០ដុល្លារ ដល់១០០០ដុល្លារ ព្រមទាំងថវិការបន្ថែម ៥០ម៉ឺនរៀលសម្រាប់អ្នកចាញ់ និង១លានរៀលសម្រាប់អ្នកឈ្នះពីលោកស្រី ទ្រី ដាណា។
