Cristiano Ronaldo បានចាយពេលឈរជើងជាកីឡាករអាជីព រយៈពេលជិត ២០ ឆ្នាំមកហើយ ដោយលោកបានបង្ហាញខ្លួនឲ្យក្លឹបនិងជម្រើសជាតិ មិនក្រោម ១ ពាន់ប្រកួតឡើយ។ ទន្ទឹមនឹងជោគជ័យដ៏ក្រាស់ក្រែល លើខ្សែបន្ទាត់នៃអាជីពរបស់កីឡាករព័រទុយហ្គាល់ ក៏ធ្លាប់ទទួលរងភាពឈឺចាប់លើទីលានច្រើនសារដែរ ជាពិសេសនៅជំនួបបរាជ័យស្ពឹកមុខ មិននឹកស្មានដល់។
ខាងក្រោម CTS Sports ធ្វើការរំឭកលើកមកបង្ហាញនូវការចាញ់ទក់សាច់ទាំង ៥ ដែលតារាឆ្នើមវ័យ ៣៦ ឆ្នាំ ធ្លាប់បានជួបប្រទះ៖
៥) Atletico Madrid យកឈ្នះ ៤-០ ទៅលើ Real Madrid
នៅខែកុម្ភៈ ឆ្នាំ ២០១៥ ក្នុងក្របខ័ណ្ឌ La Liga ក្រុមដឹកនាំដោយលោក Diego Simeone ធ្លាប់បានបង្កើតរសជាតិដ៏ជូរចត់មួយសម្រាប់ Real Madrid ដែលវាក៏ជាពេលវេលា Ronaldo កំពុងឡើងជើងខ្លាំងផងដែរ ព្រោះរដូវកាលនោះ លោករកបានដល់ទៅ ៤៨ គ្រាប់។
ប្រកួតជើងទី ១ ក្នុងទឹកដី Bernabeu ស្តេចសទប់បានត្រឹមស្មើ ១-១ តែមកដល់ជើងទី ២ នៅទឹកដី Vicente Calderon របស់ At ខាងក្រុមម្ចាស់ផ្ទះបានលុត ៤-០។ ទៅមើល Ronaldo ឈរជើងពេញ ៩០ នាទី តែមិនអាចរកបានសូម្បីតែមួយគ្រាប់។
៤) អាល្លឺម៉ង់ យកឈ្នះ ៤-០ ទៅលើព័រទុយហ្គាល់
ប្រកួតនៅជម្រើសជាតិ ដែលមិនអាចបំភ្លេចបានមួយសម្រាប់ Ronaldo គឺកាលនៅ World Cup ក្នុងពូល G ជុំទី ១ ដែលក្រុមអាល្លឺម៉ង់ បានយកឈ្នះ ៤-០ ទៅលើព័រទុយហ្គាល់ គ្រាប្រេស៊ីលធ្វើជាម្ចាស់ផ្ទះ នៅឆ្នាំ ២០១៤។
Ronaldo ដែលលេងពេញ ៩០ នាទីមិនអាចរកបានគ្រាប់បាល់នោះទេ បន្ទាប់ពីទម្រង់លេងរបស់ក្រុមមានការផ្លាស់ប្តូរ ក្រោយបាត់បង់កីឡាករសំខាន់ Pepe ដែលរងពិន័យកាតក្រហមតាំងពីនាទី ៣៧។ វាក៏ជាថ្ងៃដែល CR7 ចងចាំសមត្ថភាពរបស់ Thomas Muller បំផុតផងដែរ ព្រោះប៉ះគ្នាសារនោះ ខ្សែប្រយុទ្ធអាល្លឺម៉ង់អាចរកបាន Hat-Trick។
៣) ប្រេស៊ីលយកឈ្នះ ៦-២ ទៅលើព័រទុយហ្គាល់
នៅការលេងឲ្យជម្រើសជាតិ ក្រៅពីប្រកួតផ្លូវការកាលនៅ World Cup សម្រាប់ Ronaldo ក៏ធ្លាប់ជួបរឿងជូរចត់មួយផ្សេងទៀតដែរនៅប្រកួតមិត្តភាព កាលពីឆ្នាំ ២០០៨ បន្ទាប់ពីប្រេស៊ីលស៊ុតចូលទក់សាច់ ៦ គ្រាប់ ហើយព័រទុយហ្គាល់សងមកវិញបានតែ ២ គ្រាប់គត់។
Luis Fabiano របស់ប្រេស៊ីលជាតួឯកនៅយប់នោះ ដោយរកបាន Hat-Trick ដែលវាជាប្រកួតធ្វើឲ្យ CR7 ចងចាំបំផុត ក៏ដោយសារជាលើកដំបូង ក្រុមរបស់ Ronaldo របូតឲ្យក្រុមគូប្រជែងដល់ទៅ ៦ គ្រាប់។
២) Liverpool យកឈ្នះ ៥-០ ទៅលើ Man Utd
ស្ថិតិរបស់ Ronaldo ទល់ Liverpool ក៏ជារឿងដែលគួរឲ្យខ្លាចរអា មួយផងដែរ ជាពិសេសក្រោយចាញ់ស្ពឹកមុខ ០-៥ នៅទឹកដី Old Trafford កន្លងទៅនេះ។ CR7 ក៏ប៊ិះតែនឹងរកបានមួយគ្រាប់ តែស្តាយវាជាបាល់ Offside ដែលនាំឲ្យហង្សអាចទប់ដល់ក្លាយជាប្រកួត Clean Sheet ដ៏ល្អមួយប្រចាំរដូវកាល។
១) Barcelona យកឈ្នះ ៥-០ ទៅលើ Real Madrid
មួយលើកផ្សេងទៀត ដែលយើងចាំមិនភ្លេច គឺនៅ El Clasico កាលពីខែវិច្ឆិកា ឆ្នាំ ២០១០ ដែល Barcelona លុត Real Madrid ៥-០។ វាជាប្រកួត Clasico លើកទី ៣ សម្រាប់ CR7 ក្រោយផ្ទេរមកក្លឹបអេស្ប៉ាញ ហើយ Ronaldo ក៏មិនអាចបង្កើតគ្រាប់បាល់លើកដំបូងទល់ Barcelona បានដែរនៅប្រកួតនោះ ខណៈ Messi យ៉ាងណាក៏គេ Assist បាន ២ លើក ទោះមិនអាចរកបានគ្រាប់បាល់៕
ប្រភព៖ បរទេស