តំណែងរបស់អ្នកចាត់ការក្លឹបបិសាចក្រហម Man Utd ដែលបច្ចុប្បន្នជារបស់ លោក Ole Gunnar Solskjaer ហាក់កំពុងកាន់តែក្តៅគគុកខ្លាំង បន្ទាប់ពីរងបរាជ័យក្រោមថ្វីជើង Liverpool ០-៥ នៅទឹកដីខ្លួនឯង នៃកីឡដ្ឋាន Old Trafford។
មតិជាច្រើនលើបណ្ដាញសង្គម បានរំអុកឲ្យក្លឹបពិចារណាដកតំណែងគ្រូសញ្ជាតិន័រវែស និងជំនួសដោយគ្រូថ្មី ដែលសុទ្ធតែជាគ្រូមានសមត្ថភាពនិងកំពុងទំនេរជើង។ Hashtag ពេញនិយម #OleOUT បាននឹងកំពុងរីកសាយភាយជាបន្តបន្ទាប់នៅរយៈពេលចុងក្រោយ ហើយឥឡូវក៏ទទួលបានដំណឹងច្បាស់ការចេញពីប្រភពគួរឲ្យទុកចិត្តផងដែរ។
នោះគឺ ក្រុមប្រឹក្សាភិបាលក្លឹប Man Utd ក្រោយពីបានកោះប្រជុំគ្នារួចមក ក៏បានសម្រេចចិត្តហើយថា នឹងទុកពេលឲ្យ Ole មានឱកាស អាចស្រោចស្រង់តំណែងរបស់ខ្លួនឯង ត្រឹមរយៈពេល ៣ ប្រកួតទៀតប៉ុណ្ណោះ។ នេះមានន័យថា ប្រកួតទល់ Spurs នៅចុងសប្តាហ៍ខាងមុខ នឹងបន្តមានវត្តមាន Ole នៅឈរជើងដឹកនាំដដែល។
ជាក់ស្ដែងដ្បិតបើប៉ុន្មានប្រកួតចុងក្រោយ គេឃើញមានភាពចម្រូងចម្រាសនៃពាក្យសម្តីរវាងលោក Ole Gunnar Solskjaer និងគ្រូតាលោក Sir Alex Ferguson តែយ៉ាងណា អតីតអ្នកចាត់ការសញ្ជាតិស្កុតឡែន ក៏នៅតែមកបង្ហាញការគាំទ្រដល់កូនក្រុមចាស់របស់ខ្លួនដដែល ហើយកន្លងទៅក៏បានទៅជួប ដើម្បីបង្ហាញការណែនាំមួយចំនួនដល់ Ole នៅទីលានហ្វឹកហាត់ Carrington ផ្ទាល់។ នេះបើតាមប្រភពពី Fabrizio Romano បានចុះផ្សាយ។
ដូច្នេះមានន័យថា តំណែងរបស់ Ole នឹងត្រូវបានសម្រេច ថាត្រូវដកចេញមុនផុតកុងត្រា ឬបន្តការឈរជើង ស៊ីសងលើលទ្ធផលប្រកួតទល់ Spurs នៅថ្ងៃទី ៣០ តុលា ទល់ Atalanta នៅថ្ងៃទី ៣ វិច្ឆិកា និងទល់ Man City នៅថ្ងៃទី ៦ វិច្ឆិកា។ ប្រសិនលទ្ធផលចេញមក បរាជ័យទាំង ៣ នោះគឺច្បាស់ណាស់ Ole នឹងត្រូវអស់តំណែងហើយ រួចពេលវេលានៃ International Break រយៈពេល ២ សប្តាហ៍ ក៏សមល្មមដើម្បីឲ្យ United លៃលកស្វែងរកគ្រូថ្មីមកជំនួស និងរៀបចំក្រុមមុនឈានដល់ការវិលមកលេងជាធម្មតាវិញ។
បើសួរថា តើ CTS Sports យល់ឃើញបែបណាដែរនោះ សម្រាប់ ៣ ប្រកួតបន្ទាប់របស់ United? ចម្លើយគឺហ៊ានឆ្លើយថា Ole ប្រឈមនឹងអស់តំណែង ច្រើនជាងការដែលអាចបន្តនៅ ព្រោះសាច់បាល់ ៥ ប្រកួតកន្លងមក United លេងអត់ល្អទាល់តែសោះ ហើយកាលប៉ះ Atalanta ដែលយកឈ្នះ ៣-២ នោះក៏ជាបាល់សំណាងដែរ។
ដូច្នេះការដែលប្រកួតបន្តបន្ទាប់នាពេលខាងមុខ សុទ្ធតែត្រូវប៉ះក្រុមគីឡូធ្ងន់ផងនោះ អ៊ីចឹងដង្ហើមនៅកៅអីអ្នកចាត់ការសម្រាប់ Ole គឺរាប់ថាស្ដួចស្ដើងបំផុត។
ដោយឡែកយើងទៅមើលបេក្ខភាពដែលអាចចូលមកដឹកនាំ Man Utd បន្ទាប់ពី Ole អ្នកមានភាគរយខ្ពស់គឺ Antonio Conte ដោយលោកបានបើកចំហចិត្តត្រៀមទទួលយកសំណើណាមួយនៅពេលខាងមុខ តែដោយបង្ហាញពីការគោរព ទើប Conte មិនបង្ហើបតម្រុយអ្វីឡើយ ដរាបណាក្លឹបមិនទាន់ប្រកាសដំណឹងផ្លូវការ អំពីការដកតំណែងអ្នកចាត់ការបច្ចុប្បន្ន។
រីឯ Zinedine Zidane ដែលជាអតីតគ្រូចាស់របស់ Ronaldo វិញ បើតាមដំណឹងចុងក្រោយយើងទទួលបាន គឺលោកបើកបេះដូងរង់ចាំតែទ្រនំ ២ ប៉ុណ្ណោះ រួមមានក្លឹប Paris Saint-Germain ឬក៏ជម្រើសជាតិបារាំង ហើយក្រៅពីនោះ គឺលោកស៊ូឈរទំនេរជើង ជាពិសេសគឺក្លឹបនៅ Premier League ដែលយល់ឃើញថា នឹងមិនសក្ដិសមសម្រាប់យុទ្ធសាស្ត្រដឹកនាំដែលជារបៀបរបស់លោកនោះទេ៕
ប្រភព៖ Twitter