ក្រុមបាល់ទាត់កោះកុងអេហ្វស៊ី បានក្លាយជាជើងឯកពានរង្វាន់សម្ដេចតេជោ ហ៊ុន សែន (ថ្នាក់ខេត្ត) លើកទី១៥ ឆ្នាំ២០២១ បន្ទាប់ពីយកឈ្នះក្រុមមន្ទីរអប់រំ យុវជន និងកីឡា ខេត្តត្បូងឃ្មុំ ដោយលទ្ធផល ៣-០ ក្នុងជំនួបវគ្គផ្ដាច់ព្រ័ត្រ នៅកីឡដ្ឋានខេមបូឌាអ៊ែរវ៉េ នៅល្ងាចថ្ងៃទី២៣ ខែតុលា ឆ្នាំ២០២១។
ក្នុងការប្រកួតនេះ កីឡាករ ប៉ែន បញ្ញាវុឌ្ឍ បានស៊ុតបញ្ចូលទីខេត្តត្បូងឃ្មុំ ១គ្រាប់មុនឲ្យក្រុមកោះកុងអេហ្វស៊ី នៅនាទី៣៧។ បន្ទាប់មកនៅដើមវគ្គទី២ ក្រុមជើងឯករងឆ្នាំចាស់នេះ បានព្យាយាមវាយបកវិញ តែធ្វើពុំបានសម្រេច ព្រមទាំងបាត់បង់សមាជិកម្នាក់ គឺខ្សែការពារ លី រមី បន្ទាប់ពីរងពិន័យកាតលឿនលើកទី២ (កាតក្រហម) នៅនាទី៦៣។
ការណ៍នេះ បានធ្វើឲ្យក្រុមកោះកុងមានប្រៀប និងបានដាក់សម្ពាធខ្លាំងលើគូប្រជែង រហូតរកបាន ២គ្រាប់បន្ថែមទៀត នៅចុងម៉ោង ដោយកីឡាករ ជៀន វិសាល នៅនាទី៨១ និងកីឡាករ ពៅ ភារិទ្ធ នៅនាទី៩០+៤។ គ្រាប់ទី៣ របស់កោះកុង គឺជាគ្រាប់បាល់ពិន័យ ១១ម៉ែត្រ ក្រោយការបង្កកំហុសក្នុងប្រអប់គ្រោះថ្នាក់របស់ខ្សែការពារខេត្តត្បូងឃ្មុំ។
ជ័យជម្នះនេះ បានធ្វើឲ្យក្រុមកោះកុងអេហ្វស៊ី បើកទំព័រប្រវត្តិសាស្ដ្រលើកពានសម្ដេចតេជោ ហ៊ុន សែន (ថ្នាក់ខេត្ត) លើកដំបូង ខណៈក្រុមមន្ទីរអប់រំ យុវជន និងកីឡា ខេត្តត្បូងឃ្មុំ បានត្រឹមជើងឯករង ២ឆ្នាំជាប់គ្នា (ឆ្នាំ២០២០ និងឆ្នាំ២០២១) បន្ទាប់ពីពួកគេ ធ្លាប់ឈ្នះជើងឯកលើកដំបូង កាលពីឆ្នាំ២០១៩។
សម្រាប់រង្វាន់ជ័យលាភី នៃពានរង្វាន់សម្ដេចតេជោនាយករដ្ឋមន្ដ្រី-ថ្នាក់ខេត្តនេះ ក្រុមជើងឯកកោះកុងអេហ្វស៊ី ទទួលបានពាន អមដោយប្រាក់រង្វាន់ ១៥លានរៀល, ក្រុមជើងឯករងខេត្តត្បូងឃ្មុំ ទទួលបានប្រាក់រង្វាន់ ៧លាន ៥សែនរៀល និងលេខ៣ គឺខេត្តបន្ទាយមានជ័យ ទទួលបានប្រាក់រង្វាន់ ៥លានរៀល។ ក្រុមទាំង ៣ នឹងត្រូវដឹកដៃគ្នាឡើងទៅលេងពានរង្វាន់សម្ដេចតេជោ-ថ្នាក់ជាតិបន្ដទៀត នាពេលខាងមុខ៕