នៅរយៈពេលប៉ុន្មានឆ្នាំចុងក្រោយ ក្នុងវិស័យកីឡាបាល់ទាត់យើងបានសង្កេតឃើញមានយុវជនជាច្រើន បង្ហាញភាពលេចធ្លោជាបន្តបន្ទាប់ ហើយខ្លះក៏ស្ថិតស្ថេរបានច្រើនឆ្នាំ ខ្លះក៏បានត្រឹមតែរយៈពេលខ្លី រួចលិចទៅវិញ។
យ៉ាងណាក្រឡេកមក Cristiano Ronaldo ដែលជាកំពូលកីឡាករបាល់ទាត់ឈរជើងនៅកម្រិតដ៏ខ្ពស់ច្រើនជាង ១ ទសវត្ស ជាធម្មតាលោកមិនងាយសរសើរនរណានោះទេ តែប៉ុន្មានឆ្នាំចុងក្រោយលោកបានលាន់មាត់សរសើរគុណភាពកីឡាករក្មេងៗ ៤ រូប ដែលមានទាំងអ្នករួមសញ្ជាតិ និងកីឡាករខ្លះមិនធ្លាប់បានលេងជាមួយទាល់តែសោះ។ តើមកទល់ពេលនេះ ពួកគេទៅដល់ណាហើយ ពោលអាចទទួលបានជោគជ័យ ឬបែបណាដែរ?
៤) Martin Odegaard
កាលពីឆ្នាំ ២០១៥ Ronaldo ធ្លាប់បានសរសើរដល់សិស្សប្អូនមួយរូបនៅក្លឹប Real Madrid នោះគឺ Martin Odegaard។ តារាឆ្នើមសញ្ជាតិព័រទុយហ្គាល់ និយាយថា៖ “អ្នកឃើញកីឡាករមានឥទ្ធិពលជាច្រើន តែយ៉ាងណាខ្ញុំសូមលើកឈ្មោះ Odegaard នៃក្លឹប Madrid មកធ្វើជាគំរូ គេទើបតែអាយុ ១៦ ឆ្នាំទេ គេក្មេងណាស់ តែយើងមើលទៅគេ បាននឹងកំពុងក្លាយជាកីឡាករល្អមួយរូបទៅហើយ”។
មិនខុសពីការរំពឹងទុករបស់ Ronaldo សម្រាប់យុវជនសញ្ជាតិន័រវែស ដ្បិតមិនអាចបង្ហាញផ្លែផ្កាជោគជ័យនៅក្លឹបក្នុងទឹកដីអេស្ប៉ាញ តែគេបានអភិវឌ្ឍខ្លួន មកក្លាយជាកីឡាករសំខាន់ ក្រោមការដឹកនាំរបស់លោក Mikel Arteta នៅក្លឹប Arsenal។ ខ្សែបម្រើវ័យ ២២ ឆ្នាំត្រូវបានកាំភ្លើងធំ ចាយលុយ ៣៥ លានអឺរ៉ូ ទិញយកកាលពីរដូវក្ដៅ ឆ្នាំ ២០២១។
៣) Memphis Depay
នៅបទសម្ភាសន៍មួយផ្សេងទៀតកាលពីជាង ៤ ឆ្នាំមុន Ronaldo ធ្លាប់បានសរសើរកីឡាករហូឡង់បែបនេះថា៖ “ម្ចាស់លេខ ៧ ថ្មីនៅ Man Utd គឺ Depay ក៏រាប់បានជាកីឡាករដ៏ល្អមួយដែរ”។
យ៉ាងណាអនាគតរបស់ Depay ជាមួយ United មិនជោគជ័យដូចមាត់ Ronaldo នោះទេ។ ទើបតែផ្ទេរមកក្លឹបថ្មី Lyon កាលពីឆ្នាំ ២០១៧ ទើបរាប់បានថា អាចបង្កើតផ្កែផ្កាខ្លាំង។ ស្ថិតិជាមួយក្លឹបបារាំង Depay បង្ហាញខ្លួន ១៧៨ ប្រកួត រកបាន ៧៦ គ្រាប់និង Assist ៥៥ លើក។ បច្ចុប្បន្នគេជាកីឡាកររបស់ Barcelona និងជាកូនក្រុមសំណព្វរបស់លោក Ronald Koeman។
២) Andre Silva
កាលពីឆ្នាំ ២០១៧ Ronaldo ធ្លាប់បាននិយាយអំពីមិត្តរួមសញ្ជាតិបែបនេះថា៖ “ពេលខ្ញុំចូលនិវត្តទៅ ព័រទុយហ្គាល់នឹងនៅតែល្អ ព្រោះពួកគេរកបានខ្សែប្រយុទ្ធដ៏ល្អមួយរូបរួចទៅហើយ នោះគឺ Andre Silva”។
គេធ្លាប់ជាកីឡាកររបស់ក្លឹប AC Milan និង Frankfurt ហើយនៅរដូវក្តៅកន្លងទៅ ត្រូវបានក្លឹបអាល្លឺម៉ង់ RB Leipzig ទិញយកនៅតម្លៃខ្លួន ២៣ លានអឺរ៉ូ។ ខ្សែប្រយុទ្ធវ័យ ២៥ ឆ្នាំ នៅរដូវកាលថ្មី រកបាន ២ គ្រាប់និង Assist ៣ លើកហើយឲ្យក្លឹប Leipzig។
ខណៈនៅជម្រើសជាតិ គេទើបតែចូលលេងបាន ៥ ឆ្នាំ តែ Silva អាចរកបាន ១៩ គ្រាប់ នៅការបង្ហាញខ្លួនសរុប ៤៧ ប្រកួត។ នៅពេល Ronaldo ចូលនិវត្តទៅ គេជឿថា តំណែងខ្សែប្រយុទ្ធកណ្ដាល ១០០ ភាគរយប្រាកដជាប្រគល់មកឲ្យកីឡាករវ័យ ២៥ ឆ្នាំរូបនេះជាក់ជាមិនខាន។
១) Joao Felix
បន្ទាប់ពី Felix ផ្ទេរក្នុងតម្លៃបំបែកកំណត់ត្រា ទៅកាន់ក្លឹប Atletico Madrid នៅតម្លៃ ១២៦ លានអឺរ៉ូ តារាឆ្នើម Cristiano Ronaldo ក៏បានផ្តល់បទសម្ភាសន៍ជាមួយ TVI ដោយសរសើរពីយុវជនរបស់ក្រុមជម្រើសជាតិព័រទុយហ្គាល់ បែបនេះថា៖ “តើ Felix គេអាចបន្តភាពជោគជ័យរបស់ខ្ញុំនៅអេស្ប៉ាញបានដែរឬទេ? ខ្ញុំជឿជាក់ខ្លាំង ថាគេអាចធ្វើបាន ព្រោះគេគឺជាកីឡាករដ៏អស្ចារ្យ ដែលមានឥទ្ធិពលអាចអភិវឌ្ឍខ្លួនបាន”។
យ៉ាងណាមកទល់ពេលបច្ចុប្បន្ន គេមិនទាន់បង្កើតជោគជ័យល្អឥតខ្ចោះ ឬឈានដល់កម្រិតកំពូលនៅឡើយ ជាមួយ At Madrid ជាក់ស្តែងក្រោយការឈរជើងជាង ២ ឆ្នាំមកនេះ យុវជនធ្លាប់ជាប់ឈ្មោះជា ‘Ronaldo ទីពីរ’ អាចរកបានតែ ១៩ គ្រាប់និង Assist ៩ លើកប៉ុណ្ណោះ នៅការបង្ហាញខ្លួន ៨១ ប្រកួត៕
ប្រភព៖ បរទេស