Barcelona កាលពីអតីតកាល មិនមែនដូចជាពេលបច្ចុប្បន្ននេះទេ ផ្ទុយទៅវិញពួកគេត្រូវបានរាប់បញ្ចូលជាក្លឹបយក្សមួយនៅតំបន់អឺរ៉ុប ដែលបណ្តុំទៅដោយកីឡាករកំពូល ហើយការចាយវាយប្រចាំឆ្នាំសម្រាប់ពួកគេ ក៏មិនជាបញ្ហាចោទដែរ។
ហេតុនេះហើយបើយើងត្រលប់ទៅកាលពីជាង ១០ ឆ្នាំមុន ក្រុមមានមូលដ្ឋាននៅតំបន់កាតាឡូញ៉ា ក៏ទទួលបានឱកាសជាបន្តបន្ទាប់ ក្នុងការចុះហត្ថលេខាយកកីឡាករកំពូលមករួមក្លឹប ហើយក្នុងចំណោមនោះក៏មានគោលដៅធំ Cristiano Ronaldo ម្នាក់ផងដែរ។ តទៅនេះ CTS Sport ធ្វើការរំឭកលើកមកបង្ហាញនូវឈ្មោះកីឡាករឆ្នើម ៥ រូប ដែលអ្នកមានបុណ្យប៊ិះតែនឹងយកបានកាលពីអតីតកាល៖
៥) Vincent Kompany
ជា Legend កាន់ឆ្នាំនៅក្លឹប Man City តែកាលពីមុនឆ្នាំ ២០០៨ គេក៏ត្រូវបានក្លឹប Barcelona សម្លឹងឃើញផងដែរ ជាពិសេសក្រោយបង្ហាញទម្រង់លេងយ៉ាងល្អឲ្យក្លឹប Haburger SV នៅឯលីគកំពូលអាល្លឺម៉ង់។
បើតាមការលើកឡើងពី Kompany ធ្លាប់បាននិយាយថា៖ “ខ្ញុំកៀកនឹងសម្រេចការផ្ទេរទៅ Barcelona ប៉ុន្មានលើកហើយ ដោយកាលនោះគឺខ្ញុំពិតជាមានទំនាក់ទំនង ចរចាជាមួយភាគីក្លឹបអេស្ប៉ាញពិតមែន”។ យ៉ាងណាតាមការសម្រេចចុះឡើង កីឡាករបែលហ្សិកក៏ស្ម័គ្រស្មោះឈរជើងឲ្យ City រយៈពេល ១១ ឆ្នាំ មុនទៅចូលនិវត្តនៅក្លឹបចុងក្រោយ Anderlecht ក្នុងប្រទេសបែលហ្សិក។
៤) Juan Mata
ជាកីឡាករដែលពោរពេញដោយបច្ចេកទេសក្នុងការបញ្ជូនបាល់ ហើយ Barcelona ផ្តើមមានកូនចិត្តចាប់អារម្មណ៍គេខ្លាំង កំឡុងពេលលេងឲ្យក្លឹប Valencia។ សារនោះនៅកំឡុងឆ្នាំ ២០០៧ អ្នកមានបុណ្យបានព្យាយាមដាក់សំណើ អូសទាញយក Mata មកទឹកដី Camp Nou ដែរ តែចុងក្រោយគេសម្រេចផ្ទេរទៅក្លឹប Chelsea។
មួយលើកទៀតពេលលឺដំណឹងថា Mata ចង់ចាកចេញពី Chelsea ក៏ក្លឹប Barcelona នៅតែបន្តចាប់អារម្មណ៍គេដែរ តែការសម្រេចចិត្តរបស់កីឡាករអេស្ប៉ាញ ហាក់ស្ម័គ្រស្មោះនិងគោរពដល់អតីតថ្នាល Castilla របស់ Real Madrid រួចមិនព្រមព្រៀងជាមួយ Barcelona ទាល់តែសោះ។
៣) Mesut Ozil
គ្រា Ozil លេងឲ្យក្លឹប Werder Bremen សារនោះ Barcelona ប៊ិះតែយកបានទៅហើយ ដោយសាមីខ្លួនកីឡាករផ្ទាល់ ក៏បានមកជជែកពិភាក្សាជាមួយប្រធានក្លឹប Barcelona លោក Sandro Rosell ថែមទៀតផង។
តែយ៉ាងណាចុងក្រោយ ខាងភាគីក្រុមប្រឹក្សាភិបាលក្លឹប Werder Bremen បានបដិសេធសំណើរបស់ក្លឹប Barcelona ហើយបែរជាសម្រេចការលក់ Ozil ឲ្យទៅក្លឹបគូប្រជែងនៅឯទឹកដីអេស្ប៉ាញ នោះគឺ Real Madrid នៅខែសីហា ឆ្នាំ ២០១០។
២) David Beckham
កំឡុងពេលដើរចេញពីក្លឹប Man Utd នៅឆ្នាំ ២០០៣ អតីតខ្សែបម្រើ Beckham ក៏ត្រូវបានក្លឹប Barcelona ចាប់អារម្មណ៍ផងដែរ ដោយព្រមចាយលុយ ២៥ លានផោនទៅឲ្យក្លឹបអាណាព្យាបាល។
ការចរចាកៀកនឹងប្រកាសជាផ្លូវការទៅហើយ តែស៊យអី Real Madrid ក៏ចូលមកកាត់មុខសារជាថ្មី ដោយពួកគេហ៊ានឲ្យតម្លៃផ្ទេរ Beckham ដល់ទៅ ៣១ លានផោន ជាហេតុនាំឲ្យ Man Utd ក៏មិនស្ទាក់ស្ទើរ រួចបង្វែរគោលដៅ លក់កីឡាករអង់គ្លេសទៅឲ្យក្លឹបស្តេចស Madrid ជំនួស Barcelona។
១) Cristiano Ronaldo
នៅរដូវក្តៅឆ្នាំ ២០០៣ ក្រៅពី Man Utd ក៏មានក្លឹប Barcelona មួយផ្សេងទៀត ដែលចាប់អារម្មណ៍ទៅលើអតីតយុវជននៅក្លឹប Sporting CP។
បើតាមការឲ្យដឹងពីលោក Joan Laporta ដែលជាប្រធានក្លឹបនិយាយថា កាលនោះ Barcelona កំពុងស្ថិតក្នុងដំណាក់កាលរៀបចំក្លឹបសារជាថ្មី ហើយក៏ជួនពេលដែល Ronaldo កំពុងលេងឲ្យក្លឹប Sporting នៅឯប្រទេសព័រទុយហ្គាល់។
មុនទាំង Man Utd ចូលចរចាទៅទៀត គឺ Barcelona បានទទួលឱកាសក្នុងការចុះហត្ថលេខាយក Ronaldo កំឡុងពេលដែលពួកគេជជែកជាមួយភ្នាក់ងារលើការនាំយកកីឡាករ Deco មកកាន់ Camp Nou។ តែយ៉ាងណាដោយសារ អ្នកមានបុណ្យពេលនោះមិនទាន់អាចចាយលុយច្រើន ហើយមានលទ្ធភាពចរចាយក Ronaldo ត្រឹមតែតម្លៃ ១៧ លានអឺរ៉ូ ទើបនាំឲ្យការចរចាបរាជ័យ ខណៈ United ហ៊ានឲ្យដល់ ១៩ លានអឺរ៉ូឯណោះ៕
ប្រភព៖ បរទេស