ខ្សែប្រយុទ្ធឆ្នើមរបស់ក្លឹប PSG គឺ Leo Messi ក៏ជាបេក្ខភាពមួយក្នុងចំណោមបេក្ខភាពទាំង ៣០ នៃពានរង្វាន់ Ballon d’Or ផងដេរ ហើយកន្លងទៅនេះ លោកក៏បានទម្លាយពីអារម្មណ៍ឈឺចាប់កំឡុងការចាកចេញពីក្លឹប Barcelona។
ប្រាប់នៅបទសម្ភាសន៍ជាមួយ France Football តារាឆ្នើមវ័យ ៣៤ ឆ្នាំខាងលើរៀបរាប់បែបនេះថា៖ “ក្រោយពេលត្រលប់មកពីការលំហែកាយ ខ្ញុំបានត្រលប់ទៅ Barcelona ដោយមានបំណងចង់ចុះហត្ថលេខាកុងត្រាថ្មី រួចខ្ញុំក៏ត្រលប់ទៅហ្វឹកហាត់ភ្លាមៗជាធម្មតា តែពេលមកដល់ពួកគេនិយាយថា ក្លឹបគ្មានធនធាននឹងបន្តកុងត្រាថ្មីសម្រាប់ខ្ញុំទេ ដូច្នេះខ្ញុំមិនអាចបន្តនៅបានឡើយ”។
លោកបន្តទៀតថា៖ “វាជារឿងដ៏ឈឺចាប់បំផុត ព្រោះទាំងគ្រួសាររបស់ខ្ញុំ ក៏ត្រូវផ្លាស់ប្តូររបៀបរស់នៅ កូនៗខ្ញុំត្រូវប្តូរសាលាដើម្បីមករស់នៅជាមួយពួកយើង ហើយខ្ញុំគ្មានជម្រើសអ្វីក្រៅពីចាកចេញទេ ដ្បិតបើគម្រោងខ្ញុំចង់ចូលនិវត្តនៅ Barcelona ក៏ដោយពេលនោះ”។
និយាយអំពីការផ្ទេរមក PSG កីឡាករអាហ្សង់ទីនសង្កត់ធ្ងន់បែបនេះថា៖ “PSG បានផ្តល់ឱកាសសម្រាប់ខ្ញុំ ក្នុងការចូលរួមនៃគម្រោងរបស់ពួកគេ ខ្ញុំទទួលបានសំណើពីក្លឹបដទៃដូចគ្នា តែជាមួយ PSG គឺយើងឈានដល់កិច្ចព្រមព្រៀងយ៉ាងឆាប់រហ័ស”៕
ប្រភព៖ BeSoccer
