កំណត់ត្រាមិនស្គាល់ពាក្យថា “ចាញ់” ៣៧ ប្រកួតរបស់ក្រុមជម្រើសជាតិអ៊ីតាលី ទីបំផុតត្រូវបានក្រុមគោជល់អេស្ប៉ាញ បំបែកបានហើយកាលពីយប់មិញ នៅវគ្គ ៤ ក្រុមចុងក្រោយពានរង្វាន់ UEFA Nations League។
ពីរគ្រាប់របស់ Ferran Torres នៅនាទី ១៧ និង ៤៥+២ បានជួយឲ្យអេស្ប៉ាញ យកឈ្នះទៅលើអ៊ីតាលី ដ្បិតបើ Lorenzo Pellegrini អាចរកបានគ្រាប់បាល់នៅចុងតង់នាទី ៨៣។ អាចថាដោយសារអ៊ីតាលី បាត់បង់កីឡាករសំខាន់ក្រោយរងពិន័យកាតក្រហមគឺ Leonardo Bonucci នៅនាទី ៤២ ទើបធ្វើឲ្យក្រុមការពារជើងឯក Euro ពិបាកនឹងបង្កើតចន្លោះយកឈ្នះបែបនេះ។
អ៊ីតាលីនៅសល់ឱកាសដណ្តើមយកលេខ ៣ នៅពាន Nations League របស់ UEFA ដោយនៅរង់ចាំអុតមើលលទ្ធផលក្រុមបារាំងនិងបែលហ្សិកនៅរាត្រីនេះ។ ការប្រកួតក៏នឹងមានផ្សាយផ្ទាល់លើទំព័រ CTS Sports ផងដែរ៕
