ដ្បិតបើក្លឹបតោខៀវ Chelsea នៅរយៈពេលចុងក្រោយ ឃើញថាមានការចាប់អារម្មណ៍ខ្លាំងពីសំណាក់អ្នកគាំទ្រ ជាពិសេសក្រោយឈ្នះពាន UEFA Champions League តែក្នុងបញ្ជីកីឡាករទាំង ១០ កើបលុយបានច្រើនបំផុតប្រចាំឆ្នាំ គឺគ្មានឈ្មោះសមាជិកនៅក្លឹបមួយនោះទេ។
ផ្ទុយទៅវិញនៅ Premier League គឺមានតែកីឡាកររបស់ក្លឹប Man United និង Liverpool ប៉ុណ្ណោះក្នុងចំណោមក្លឹបកំពូលទាំង ៦។ បើតាមរបាយការណ៍ពី Forbes បានចុះផ្សាយនៅឈ្មោះតារាបាល់ទាត់ ១០ រូប ដែលអាចកើបលុយចូលហោប៉ៅបានច្រើនបំផុតប្រចាំឆ្នាំ ២០២១ ដោយបូកនូវថ្លៃពលកម្មដែលពួកគេទទួលបាន និងទំហំនៃកិច្ចព្រមព្រៀងរវាងក្រុមហ៊ុនជាម្ចាស់ឧបត្ថម្ភ រាប់ចាប់ពីថ្ងៃទី ១ មករា រហូតដល់ដំណាច់ឆ្នាំ៖
១០) Eden Hazard ក្លឹប Real Madrid ទទួលបាន ២៩ លានដុល្លារ
៨) Gareth Bale ក្លឹប Real Madrid ទទួលបាន ៣២ លានដុល្លារ
៨) Paul Pogba ក្លឹប Man Utd ទទួលបាន ៣៤ លានដុល្លារ
៧) Andres Iniesta ក្លឹប Vissel Kobe ទទួលបាន ៣៥ លានដុល្លារ
៦) Robert Lewandowski ក្លឹប Bayern Munich ទទួលបាន ៣៥ លានដុល្លារ
៥) Mohamed Salah ក្លឹប Liverpool ទទួលបាន ៤១ លានដុល្លារ
៤) Kylian Mbappe ក្លឹប PSG ទទួលបាន ៤៣ លានដុល្លារ
៣) Neymar Jr ក្លឹប PSG ទទួលបាន ៩៥ លានដុល្លារ
២) Lionel Messi ក្លឹប PSG ទទួលបាន ១១០ លានដុល្លារ
១) Cristiano Ronaldo ក្លឹប Man Utd ទទួលបាន ១២៥ លានដុល្លារ
គួរបញ្ជាក់ថា លេខរៀងទី ១ ដែលមានឈ្មោះ CR7 តាមថា អាចជានឹងធ្លាក់មកលេខ ២ ប្រសិនណា Messi មានឈ្មោះជាកីឡាកររបស់ក្លឹបបារាំង PSG តាំងតែពីដើមឆ្នាំ ២០២១។ ទំហំប្រាក់ពលកម្មជារួម Messi ទទួលបាន ៧៥ លានដុល្លារ រាប់ទាំងការចាយពេលឲ្យក្លឹប Barcelona និង PSG ពេញមួយឆ្នាំ ខណៈ Ronaldo ទទួលបាន ៧០ លានដុល្លារ ជាមួយការចាយពេលនៅក្លឹប Juventus និង Man Utd។
យ៉ាងណានៅទំហំកិច្ចព្រមព្រៀងផ្សេងៗ ជាមួយក្រុមហ៊ុនជាម្ចាស់ឧបត្ថម្ភគឺ Ronaldo នៅតែមានប្រៀបជាង Messi ពោលកីឡាករព័រទុយហ្គាល់ទទួលបាន ៥៥ លានដុល្លារ ធៀបនឹងកីឡាករអាហ្សង់ទីនទទួលបានត្រឹម ៣៥ លានដុល្លារប៉ុណ្ណោះ។
គួរបញ្ជក់ដែរថា បើធៀបទៅឆ្នាំ ២០២០ ចំណាត់ថ្នាក់ទាំង ១០ ហាក់មានការប្រែប្រួលច្រើន ជាក់ស្តែងដូចតំណែងលេខ ១ និងលេខ ២ របស់ Ronaldo&Messi គឺមានការឆ្លាស់គ្នា ហើយកីឡាករដែលបាត់ឈ្មោះចេញពីបញ្ជី រួមមាន Antoine Griezmann និង David de Gea ហើយជំនួសមកវិញដោយ Andres Iniesta និង Eden Hazard៕