ក្លឹបមេឃខៀវ Manchester City ត្រូវបានគេរាយការណ៍ថា កំពុងត្រៀមផែនការណ៍ចាយលុយធំថ្ពក់យក Kylian Mbappe នៅទីផ្សារដោះដូររដូវរងាខាងមុខ ដើម្បីធានាថាក្លឹបអាចពង្រឹងតំបន់ប្រយុទ្ធជាថ្មី ក្រោយមានចន្លោះប្រហោងដូចពេលសព្វថ្ងៃ។
ក្លឹប Real Madrid ក៏ជាគូប្រជែងមួយដែរ ក្នុងការចង់បាន Mbappe ពី PSG តែបើនិយាយពីសម្ព័ន្ធភាពរវាងក្លឹបអេស្ប៉ាញ-បារាំង ហាក់មិនស៊ីខ្សែគ្នាទាល់តែសោះ។ យ៉ាងណាពេលនេះ ក្លឹប Man City មានសេដ្ឋីលោក Sheikh Mansour ជាម្ចាស់ បានផ្តល់ដំណឹងទៅថ្នាក់ក្រោមទាំងអស់ហើយ ឲ្យរៀបផែនការណ៍ចូលចរចានាំយកយុវជនឆ្នើមវ័យ ២២ ឆ្នាំ មកចូលរួមនៅ Etihad ឲ្យបាន បើទោះបីក្លឹបត្រូវចាយក្រាស់ក្រែលប៉ុណ្ណាក៏ដោយ។ នេះបើតាមការការលើកឡើងក្នុងប៉ុស្តិ៍កម្មវិធី The Transfer Window។
បញ្ជាក់ថា Mbappe សេសសល់សុពលភាពកុងត្រាដល់ចុងខែមិថុនា ឆ្នាំ ២០២២ ហើយកន្លងទៅ Real ធ្លាប់ដាក់សំណើដល់ទឹកប្រាក់ ១៧១ លានផោន តែ PSG នៅតែមិនព្រម ដោយចោទថា ក្លឹបដឹកនាំដោយលោក Florentino Perez លេងខ្សែលើគេពេក អ៊ីចឹងចាំមើល Man City ចូលចរចាពេលខាងមុខនេះវិញម្តង៕
ប្រភព៖ Sportsmole