មានចចាមអារ៉ាមថា លោក Erik Ten Hag ក៏ស្ថិតក្នុងចំណោមបេក្ខភាពដែលអាចចូលជំនួសតំណែងលោក Ronald Koeman នៅក្លឹប Barcelona នាពេលបន្ទាប់ផងដែរ តែតាមការបញ្ជាក់ថ្មីៗនេះ សាមីខ្លួនហាក់ច្រានចោល ដោយមិនផ្តល់ភ្លើងខៀវអ្វីនោះឡើយ។
ជាការពិត Koeman កំពុងទទួលរងសម្ពាធពីអ្នកគាំទ្រ ក្រោយដឹកនាំ Barcelona មិនបានល្អ ហើយជាពិសេសទើបតែចាញ់ Bayern Munich ក្នុងដីខ្លួនឯង ៣-០ និងធ្លាក់ទម្រង់លេងខ្លាំងនៅប៉ុន្មានប្រកួតចុងក្រោយ។ ក៏មានដំណឹងថា ប្រធានក្លឹបលោក Joan Laporta កំពុងពិចារណាចង់ដកតំណែងគ្រូសញ្ជាតិហូឡង់ រួចមានបេក្ខភាពជាច្រើនដែលក្លឹបបានពិចារណា។
មួយក្នុងចំណោមនោះក៏មានគ្រូនៅក្លឹប Ajax លោក Erik Ten Hag ផងដែរ ហើយថ្មីៗនេះ អ្នកចាត់ការរបស់ Ajax បានឆ្លើយតបប្រាប់សារព័ត៌មាន ESPN៖ “តើខ្ញុំត្រូវធ្វើបែបណាជាមួយរឿងទាំងអស់នោះ? ខ្ញុំកំពុងរវល់ជាមួយ Ajax ដោយចចាមអារ៉ាមទាំងនោះ អាចថារីករាយសម្រាប់អ្នក តែសម្រាប់ខ្ញុំគឺអត់ទេ”។
គួររំឭកថា អ្នកចាត់ការវ័យ ៥១ ឆ្នាំ បានដឹកនាំក្លឹប Ajax Amsterdam ១៧៥ ប្រកួត ស្គាល់ជ័យជម្នះ ១២៩ ស្មើ ២២ និងចាញ់ ២៤ លើក។ លោកក៏ធ្លាប់ដឹកនាំ Ajax ទម្លាក់ក្លឹបធំៗមួយចំនួនផងដែរនៅ UCL កន្លងមក និងធ្លាប់បានឡើងដល់វគ្គ ៤ ក្រុមចុងក្រោយកាលពីរដូវកាល ២០១៨/១៩៕
ប្រភព៖ Metro