ការប្រៀបធៀបរវាង Cristiano Ronaldo និង Lionel Messi គឺជាប្រធានបទដែលគេរមែងលើកមកជជែកឥតឈប់ នៅរយៈពេលជាង ១ ទសវត្សចុងក្រោយនេះ។ ការរកគ្រាប់បាល់ និងកំណត់ត្រាជាច្រើន ដែលកីឡាករព័រទុយហ្គាល់ និងអាហ្សង់ទីនបានប្រជែងគ្នាជាបន្តបន្ទាប់ នាំឲ្យការយល់ឃើញថានរណាល្អបំផុត គឺជាចម្លើយដែលពិបាកនឹងឆ្លើយ។
យ៉ាងណាសម្រាប់កីឡាករកំពូលចាស់ថ្មី ៥ រូបនេះ បានសារភាពចំៗថា ពួកគេមើលឃើញ Ronaldo ល្អជាង Messi៖
៥) Iker Casillas
អតីតវីរបុរសប្រចាំក្លឹប Real Madrid និងជាអ្នកចាំទីដៃស្អិតបំផុតមួយនៅតំបន់អឺរ៉ុប ធ្លាប់បានរួមជើងជាមួយ Ronaldo រយៈពេល ៥ ឆ្នាំ ហើយបានឈ្នះពាន Champions League និង La Liga។
បុរសសញ្ជាតិអេស្ប៉ាញ ធ្លាប់បាននិយាយប្រាប់សារព័ត៌មាន Cadena Cope ដូច្នោះថា៖ “ខ្ញុំសូមជ្រើសយក Cristiano ជាជាង Messi ព្រោះគេជាកីឡាករដែលអាចផ្តល់គ្រប់យ៉ាងឲ្យយើងរៀងរាល់រដូវកាល ខ្ញុំស្គាល់គេច្បាស់ គេជាកីឡាករដែលដឹងពីរបៀបហ្វឹកហាត់ ដឹងពីអ្វីដែលគេចង់បានពិតប្រាកដ”។
៤) Zinedine Zidane
ធ្លាប់ជាកីឡាកររបស់ក្លឹប Real Madrid និងអតីតគ្រូបង្វឹករបស់ Ronaldo ដូច្នេះមិនជារឿងភ្ញាក់ផ្អើលទេ ដែលម្ចាស់ពាន World Cup ឆ្នាំ ៩៨ ជ្រើសយកកីឡាករព័រទុយហ្គាល់ ជាកីឡាករល្អបំផុតគ្រប់ពេលវេលា។
Zidane ធ្លាប់បាននិយាយ៖ “Cristiano ជាកីឡាករល្អបំផុត ដោយ Messi គឺជាគូប្រជែងរបស់គេ តែ Ronaldo គេអស្ចារ្យជាង ហើយគ្មានពាក្យអ្វីដែលអាចរៀបរាប់ពីបុរសម្នាក់នេះបានឡើយ គេល្អជាងទាំងខ្ញុំទៅទៀត បើទោះបីខ្ញុំធ្លាប់ឆ្លងកាត់អាជីពដ៏ល្អមួយក៏ដោយ ជារួមទៅគេជាកីឡាករល្អគ្រប់ពេលវេលា”។
៣) Roberto Carlos
អតីតខ្សែការពារស្លាបដែលរកបានគ្រាប់បាល់ច្រើនបំផុតនៅ UCL ក៏ធ្លាប់តតាំង Leo Messi ប៉ុន្មានលើកហើយដែរ កាលខ្លួនចាយពេលជាមួយក្លឹប Real Madrid។
Carlos ធ្លាប់និយាយថា៖ “ខ្ញុំមើល Cristiano ហ្វឹកហាត់រាល់ថ្ងៃ ហើយរបៀបដែលគេហ្វឹកហាត់គឺពិតជាគួរឲ្យចាប់អារម្មណ៍ ដ្បិតបើ Messi ជាកីឡាករអស្ចារ្យមួយរូប តែរបៀបដែល Cristiano ហ្វឹកហាត់ លក្ខណៈជាកីឡាករអាជីព ការផ្តោត ការបំផុសទឹកចិត្ត និងជោគជ័យដែលគេសម្រេចបាន គឺ Cristiano មានប្រៀបជាងនរណាទាំងអស់”។
២) Michael Owen
អតីតខ្សែប្រយុទ្ធនៅក្លឹប Man Utd មិនធ្លាប់មានពេលវេលា លេងតតាំង Ronaldo និង Messi ដ្បិតបើលោកទើបតែចូលនិវត្តនៅឆ្នាំ ២០១៣។
Owen ធ្លាប់បាននិយាយថា៖ “ការបញ្ចប់ទីជាសិល្បៈដែលលំបាកបំផុតក្នុងពិភពបាល់ទាត់ តែ Ronaldo ធ្វើមើលទៅស្រួលណាស់ ទាំងក្បាលទាំងជើងឆ្វេងជើងស្តាំ ទាំងល្បឿនដ៏លឿន គឺខ្ញុំគិតថា គេមានប្រៀបជាង Messi បើរាប់ទាំងកាយសម្បទាមួយតួខ្លួន”។
១) Kylian Mbappe
ជាកីឡាកររបស់ PSG និងបច្ចុប្បន្នទើបជាមិត្តរួមក្រុមរបស់ Lionel Messi តែកន្លងទៅ កីឡាករបារាំងគឺជាអ្នកគាំទ្រ Cristiano Ronaldo ឯណោះទេ។
អតីតយុវជនក្លឹប Monaco ធ្លាប់បាននិយាយថា៖ “ពីមួយឆ្នាំទៅមួយឆ្នាំ ការជ្រើសរើសរវាង Cristiano Ronaldo និង Lionel Messi ខ្ញុំតែងតែមានការផ្លាស់ប្តូរ តែយ៉ាងណាខ្ញុំតែងតែរើសយក Ronaldo ញឹកញាប់ជាង ព្រោះខ្ញុំស្រលាញ់គាត់តាំងតែពីកាលខ្ញុំនៅក្មេង”៕
ប្រភព៖ Sportskeeda