Barcelona បន្ទាប់ពីចាញ់ Bayern Munich ក្នុងដីខ្លួនឯង ៣-០ ឥឡូវមកមើលការប្រកួតនៅក្របខ័ណ្ឌ La Liga បែរជាលេងស្មើទល់ Granada ទាំងរដាក់រដុបថែមទៀត។ ដល់ថ្នាក់តំបន់ប្រយុទ្ធ ប្តូរមកដាក់ Gerard Pique ជាកីឡាករលេងតំណែងការពារមកចូលជំនួស ហើយកំហុសទាំងអស់គ្រប់គ្នា កំពុងទម្លាក់មកលើអ្នកចាត់ការលោក Ronald Koeman។
ដ្បិតបើសុពលភាពកុងត្រាត្រូវផុតនៅចុងខែមិថុនា ឆ្នាំ ២០២២ តែតាមដឹងក្រុមប្រឹក្សាភិបាលហាក់កំពុងរំអុកប្រធានក្លឹបលោក Joan Laporta ជាខ្លាំង ពោលចង់ឲ្យដកគ្រូសញ្ជាតិហូឡង់ចេញឲ្យបានឆាប់រហ័ស។ យ៉ាងណាបើសួរថា តើនរណានឹងចូលមកជំនួសនៅតំណែងដែលកំពុងទទួលរងសម្ពាធមួយនោះ? ទំព័រ CTS Sports សូមបង្ហាញឈ្មោះបេក្ខភាពទាំង ៥ មានភាគរយខ្ពស់បំផុតដូចខាងក្រោម៖
៥) Jordi Cruyff
ជាកូនប្រុសបង្កើតរបស់លោក Johan Cruyff ហើយសព្វថ្ងៃក៏បម្រើការនៅផ្នែកគ្រប់គ្រងការពិគ្រោះយោបល់ប្រចាំក្លឹប Barcelona។ អតីតកាល Jordi ធ្លាប់ជាអ្នកចាត់ការជម្រើសជាតិអេក្វាឌ័រ និងក្រុម SZ FC បានរយៈ ពេលខ្លី ហេតុនេះហើយគេជឿថា បុរសវ័យ ៤៧ ឆ្នាំ ក៏រាប់បានជាបេក្ខភាព ១ ក្នុងចំណោមអ្នកទាំង ៥ ផងដែរ។
៤) Henrik Larsson
ធ្លាប់ជាអតីតកីឡាករចាយពេល ចន្លោះឆ្នាំ ២០០៤ ដល់ ២០០៦ និងជាចំណែកជួយក្រុមលើកពាន UEFA Champions League នាសម័យកាលនោះ។ Larsson សព្វថ្ងៃជាជំនួយការគ្រូបង្វឹក រាប់បានជាដៃស្តាំរបស់លោក Ronald Koeman តែកាលពីអតីតកាល លោកក៏ធ្លាប់ឆ្លងកាត់បទពិសោធន៍ដឹកនាំក្លឹបមួយចំនួនហើយដែរ ដូច្នេះបើ Barca ចាប់អារម្មណ៍គ្រូដឹកនាំបណ្តោះអាសន្ន នោះការដាក់ឈ្មោះបុរសសញ្ជាតិស៊ុយអែត គឺជារឿងដែលមិនគួររំលង។
៣) Erik Ten Hag
បុរសវ័យ ៥១ ឆ្នាំ បានដឹកនាំ Ajax ទទួលបានជោគជ័យគួរឲ្យកត់សម្គាល់នៅប៉ុន្មានឆ្នាំចុងក្រោយ ជាពិសេសនៅលំដាប់ពានអឺរ៉ុប ធ្លាប់ទម្លាក់ក្លឹបធំៗដូចជា Man Utd, Real Madrid និង Juventus ហើយអាចឆ្លងទៅដល់វគ្គពាក់កណ្ដាលផ្ដាច់ព្រ័ត្រ។
អ្នកចាត់ការដែលមានជំនាញក្នុងការប្រើប្រាស់ប្រព័ន្ធ ៤-៣-៣ ដឹកនាំ Ajax ១៧៤ ប្រកួត ឈ្នះ ១២៨ ស្មើ ២២ និងចាញ់ ២៤ លើកគត់។ ដ្បិតបើសុពលភាពកុងត្រានៅក្លឹបហូឡង់ត្រូវផុតនៅឆ្នាំ ២០២៣ តែជឿថា ប្រសិន Barcelona ផ្តល់ឱកាសឲ្យ នោះគ្រូសញ្ជាតិហូឡង់ ប្រាកដជាមិនបដិសេធឡើយ។
២) Roberto Martinez
គ្រូសញ្ជាតិអេស្ប៉ាញ បានហែលកាត់បទពិសោធន៍ជោគជាំទាំងការដឹកនាំក្លឹបនិងជម្រើសជាតិ ជាពិសេសជាមួយបិសាចក្រហមបែលហ្សិកនៅរយៈពេលជាង ៥ ឆ្នាំមកនេះ ឃើញថា ទទួលបានលទ្ធផលល្អគួរសម ដ្បិតបើមិនបានលើកពានរង្វាន់ណាមួយក្តី។
គ្រូដែលជំនាញក្នុងការរៀបប្រព័ន្ធ ៣-៤-២-១ បែបប្រយុទ្ធ ជឿថាពិតជាសក្តិសមជាមួយប្រព័ន្ធកីឡាករដែល Barcelona កំពុងមានសព្វថ្ងៃនេះ។ យ៉ាងណាវាស៊ីសងលើការចរចា និងផែនការណ៍អូសទាញពីសំណាក់ក្លឹបប្រសិនចង់បាន Martinez ពិតមែន ព្រោះអីការប្រកួត World Cup ក៏កៀកចូលមកដល់ ដូច្នេះការជំនួស Koeman ក្នុងរយៈពេលដ៏ខ្លីខាងមុខ ក៏រាប់បានជាការសម្រេចចិត្តដ៏ពិបាកមួយដែរ។
១) Xavi Hernandez
គ្មាននរណាសក្តិសមជាង Xavi បំផុតនោះទេ ក្នុងការមកដឹកនាំ Barcelona បន្ទាប់ពី Koeman។ អតីតខ្សែបម្រើកាន់ឆ្នាំរូបនេះ ទទួលបានឱកាសច្រើនលើកច្រើនសារហើយពីក្លឹបម្ចាស់ដី Camp Nou តែសាមីខ្លួនគេបដិសេធ ក្រោមហេតុផលរៀបចំខ្លួនមិនទាន់រួចរាល់។
យ៉ាងណាប្រសិន Barcelona ចង់គាស់ប្រព័ន្ធ Tiki-taka ឲ្យដំណើរការជាថ្មី គឺមានតែជម្រើសយក Xavi មកដឹកនាំទេ ទើបអាចទៅរួច ជាក់ស្តែងរបៀបដឹកនាំរបស់គ្រូសញ្ជាតិអេស្ប៉ាញនៅក្លឹប Al Sadd ក្នុងប្រទេសកាតា ឃើញថាបានផលដូចការគ្រោងទុក បន្ទាប់ពីអាចយកឈ្នះពានរង្វាន់ផ្ទួនគ្នាកាលពីរដូវកាលមុន។ ចុះសម្រាប់គ្នាយើងវិញ គិតថានរណាសក្តិសមជាងគេក្នុងការមកជំនួសតំណែងលោក Ronald Koeman?
ប្រភព៖ Sportskeeda