ខ្សែបម្រើ James Rodriguez បានធ្វើឱ្យដំណើរដល់កាតាហើយ ដើម្បីត្រៀមចូលរួមលេងឱ្យក្លឹប Al Rayyan ក្នុងប្រទេសនេះ ក្រោយពីរូបគេមិនមាននាទីលេងនៅក្រុម Everton។
វត្តមានរបស់លោក Rafael Benitez មកដឹកនាំក្រុម Everton បានធ្វើឱ្យ James មិនមានឱកាសលេងនោះទេ និងស្ថិតក្នុងបញ្ជីកីឡាករត្រូវលក់ចេញថែមទៀត។ ខ្សែបម្រើវ័យ៣០ឆ្នាំស្វែងរកក្លឹបថ្មីលេង ហើយបច្ចុប្បន្នគេកំពុងនៅកាតា ដោយរំពឹងថាអាចស្វែងរកឱកាសចាប់ផ្ដើមថ្មីបានជាមួយក្រុម Al Rayyan ។ ការពិបាករកក្លឹបលេងនោះ ក៏ដោយសារតែតម្លៃពលកម្មរបស់គេខ្ពស់ខ្លាំងពេក ដល់ទៅ២សែនផោនក្នុង១សប្ដាហ៍ទៅហើយ។
នៅពេលនេះ Everton រង់ចាំតែការស្នើទិញពីក្លឹបនៅកាតាប៉ុណ្ណោះ។ មិនថាក្លឹបមួយណានោះទេ ដោយតែដាក់តម្លៃខ្លួនមក ក្រុមនៅអង់គ្លេសមួយនេះទំនងជាលក់ចេញភ្លាម ព្រោះ James មិនស្ថិតក្នុងគម្រោងប្រើប្រាស់របស់ពួកគេឡើយ៕ប្រភព៖ BBC
