ក្រុមសេះបង្កង់ Juventus នៅតែមិនអាចស្គាល់ពាក្យថាឈ្នះបាននោះទេ ក្នុងការប្រកួតលីគកំពូលអ៊ីតាលីនារដូវកាលនេះ ក្រោយពីលេងបានត្រឹមស្មើ AC Milan ១-១។
ក្រោយពីចែកគ្នាម្នាក់១ពិន្ទុពីការប្រកួតនៅយប់មិញនេះ បានធ្វើឱ្យក្រុម Juventus ជាប់កំណត់ត្រាអាក្រក់បំផុតមួយហើយក្នុងរយៈពេល៦០ឆ្នាំចុងក្រោយមកនេះ ពោលគឺលេង៤ប្រកួត មិនឈ្នះសោះ។ ខណៈដែលលទ្ធផលនេះទៀតសោត ឆ្លងកាត់៤ប្រកួត មាន២ពិន្ទុ បានធ្វើឱ្យក្រុមរបស់លោក Massimiliano Allegri ស្ថិតនៅលេខ១៨ ដែលជាកន្លែងកាត់ចោលថែមទៀត។ អ្នកគាំទ្រ ក៏ចាប់ផ្ដើមមិនពេញចិត្តជាមួយការដឹកនាំរបស់អ្នកចាត់ការរូបនេះដែរ។
ក្រុម Juventus ត្រូវបានគេមើលឃើញថាតាំងពីខ្សែប្រយុទ្ធ Cristiano Ronaldo ចេញទៅ កីឡាករម្នាក់ៗហាក់ដូចជាលេងមិនបានល្អទាល់តែសោះ។ បើទោះជាការជម្រើស១១នាក់ដំបូងល្អយ៉ាងណា ក៏មើលឃើញថាក្រុមនេះមិនខ្លាំងដូចមុនទៀតដែរ។ ពួកគេហាក់ដូចជាបាត់បង់កម្លាំងចិត្តក្នុងការប្រកួតប្រជែងទៅហើយ៕
ប្រភព៖ DailyMail