Mateo Messi គឺជាកូនទី ២ ក្នុងចំណោមកូន ៣ នាក់របស់តារាឆ្នើម Lionel Messi និងអ្នកស្រី Antonella Roccuzzo។ ក្មេងប្រុសអាយុ ៦ ឆ្នាំរូបនេះ ជាញឹកញយបានបង្កើតរឿងគួរឲ្យអស់សំណើចជាច្រើន ហើយក៏ត្រូវបានអ្នកគាំទ្រ Messi ចាប់អារម្មណ៍ទៅលើគេខ្លាំងបំផុតផងដែរ បើធៀបនឹងបងប្អូនបង្កើត ២ រូបឯទៀតមាន Ciro និង Thiago។
ដោយឡែកឆ្លើយតបនឹងការសំណូមពរពីអ្នកគាំទ្រទំព័រ CTS Sports ដែលចង់ដឹងរឿងរ៉ាវមួយចំនួនពីកូនប្រុសកំពូលកូរ Mateo អ៊ីចឹងក្នុងអត្ថបទនេះ យើងសូមលើកមកបង្ហាញ ៥ ចំណុចដូចខាងក្រោម៖
៥) ពូកែណាស់ខាងធ្វើត្រាប់តាម
ច្រើនសារហើយ យើងធ្លាប់បានឃើញ Mateo ធ្វើត្រាប់តាមឪពុករបស់គេ មិនថាតែស្ទាយអបអរ និងរបៀបនៃការស៊ុតបញ្ចូលទី ក៏ដូចជាបច្ចេកទេសនៃការញាក់បាល់។
យ៉ាងណាសកម្មភាពមួយ ដែលក្មេងតូចអាយុ ៦ ឆ្នាំធ្វើត្រាប់សឹងតែដូចបំផុតនោះ គឺការរកគ្រាប់បាល់ទល់ក្លឹប Real Madrid របស់ឪពុកគេ កាលពីប្រកួត UCL ឆ្នាំ ២០១១។ Mateo គេបានអូសបាល់កាច់មកក្បែរបង្គោលទីខាងស្តាំ ហើយផ្តួលខ្លួនស៊ុតបញ្ចូលទី រួចបញ្ចេញស្ទាយអបអរដូចជា Messi បេះដាក់។
៤) មូលហេតុដែលគេតែងតែគាំទ្រក្លឹប Real Madrid
ដោយសារបងប្រុសធំរបស់គេ គឺ Thiago ជាអ្នកគាំទ្រក្លឹប Barcelona ទើបធ្វើឲ្យប្អូនប្រុស Mateo មានចិត្តចង់ប្រឆាំង ហើយក្លាយជាអ្នកដែលពូកែកូរប្រចាំគ្រួសារ។
ប្រសិនមានការប្រកួតរវាង Barcelona និង Real Madrid កាលពីប៉ុន្មានឆ្នាំមុន ពេលខាងក្រុមរបស់ Messi ស៊ុតចូល គឺគេធ្វើទឹកមុខស្មើធម្មតា បើពេលឃើញបងប្រុសគេអបអរ ផ្ទុយទៅវិញពេលខាង Real ស៊ុតចូល Mateo បែរជាមកស្រែកហ៊ោរសប្បាយទៅវិញ។ ដោយសារឃើញទម្លាប់ដ៏ហួសចិត្តបែបនេះ ដល់ថ្នាក់អតីតខ្សែការពារក្លឹបស្តេចស លោក Alvaro Arbeloa ធ្លាប់និយាយថា ទៅថ្ងៃមុខក្លឹប Real Madrid គួរតែចុះហត្ថលេខាយក Mateo Messi មកចូលរួម។
៣) ភាពយន្តដែលគេចូលចិត្តបំផុត
រឿងមួយដែល Mateo និងបងប្រុសរបស់គេគឺ Thiago មិនប្រឆាំងគ្នា គឺការដែលស្រលាញ់ភាពយន្ត Harry Potter តែមួយ ហើយជានិច្ចកាលក៏តែងតែរៀបចំខ្លួនជាតួអង្គក្នុងភាពយន្តនោះ។
២) ស្រលាញ់ការរាំច្រៀង
ក្មេងច្រឡឺម Mateo តាមការទម្លាយពីឪពុករបស់គេ គឺនៅមិនចេះស្ងៀមនោះទេ។ ក្រៅពីការលេងរបស់របរទូទៅដូចក្មេងឯទៀត កុមារាសញ្ជាតិអាហ្សង់ទីនរូបនេះ ក៏ជាក្មេងដែលមានដុងស្រលាញ់ការរាំច្រៀងពីកំណើតផងដែរ។
ធ្លាប់ឃើញវីដេអូរបស់គេ ដែលអាយុទើបតែ ៦ ឆ្នាំ តែបែរជាមកអង្គុយគោះស្គរ ហើយច្រៀងដូចជាមនុស្សធំ។ ដោយឡែកថ្មីៗនេះ ក៏ទើបតែលេចធ្លាយវីដេអូមួយ ដែល Mateo ជាមួយបងប្អូន ២ រូបឯទៀត ធ្វើត្រាប់តាម Rapper ល្បីឈ្មោះរបស់បារាំង ក្នុងបន្ទប់សណ្ឋាគារនៅទីក្រុងប៉ារីសទៀតផង។
១) ជាមិត្តជិតស្និទ្ធរបស់ Davi Lucca
តាមពិតទៅ Mateo ចាប់ផ្ដើមស្និទ្ធជាមួយកូនប្រុសបង្កើត Neymar តាំងតែពីកាលកីឡាករប្រេស៊ីលឈរជើងឲ្យក្លឹប Barcelona ហើយមកទល់ពេលចុងក្រោយនេះ គេកាន់តែសប្បាយចិត្តក្រោយបានមកជួបមិត្តចាស់ Davi Lucca ដែលមានអាយុបងគេ ៤ ឆ្នាំនៅឯទឹកដីប្រទេសបារាំង។
ពួកគេទាំងពីរ ក៏កំពុងហ្វឹកហាត់នៅថ្នាលរបស់ PSG ផងដែរ ដូច្នេះថាមិនត្រូវទៅថ្ងៃខាងមុខ អាចក្លាយជាកីឡាកររួមជើងលើទីលាន ដូចជា Messi/Neymar ពេលនេះក៏ថាបាន៕
ប្រភព៖ បរទេស