Premier League ឬយើងស្គាល់ថា ជាលីគលំដាប់ទី ១ របស់អង់គ្លេស បានបង្កើតឡើងរយៈពេល ២៩ ឆ្នាំមកហើយ ពោលចាប់តាំងពីថ្ងៃទី ២៨ កុម្ភៈ ឆ្នាំ ១៩៩២។ ឆ្លងកាត់ជិត ៣ ទសវត្សមកនេះ យើងក៏បានស្គាល់នូវកីឡាករកំពូលៗជាច្រើន មកពីតាមបណ្តាទ្វីបផ្សេងគ្នា មានតាំងពីអឺរ៉ុប អាស៊ី អាមេរិកឡាទីន និងអាហ្រ្វិកជាដើម។
យ៉ាងណាក្នុងអត្ថបទនេះ ទំព័រ CTS Sports សូមលើកមកបង្ហាញឲ្យស្គាល់នៅកីឡាករអាស៊ីល្អបំផុតទាំង ៥ ក្នុងប្រវត្តិសាស្ត្រ Premier League ហើយក៏ជឿថា យ៉ាងហោចណាស់គ្នាយើងស្គាល់បាន ២-៣ រូបដែរ៖
៥) Maya Yoshida ជនជាតិជប៉ុន
ឈ្មោះជាខ្សែការពារកណ្តាលដ៏លេចធ្លោមួយរូបរបស់ក្លឹប Southampton ហើយបានចាយពេលចន្លោះឆ្នាំ ២០១២ ដល់ ២០២០ មុនប្រកាសផ្ទេរចេញទៅលីគកំពូល Serie A ជាមួយក្លឹបថ្មី Sampdoria។
Yoshida ដែលត្រូវបានក្លឹប Southampton ទិញចេញពីក្លឹប VVV-Venlo នៅឯលីគហូឡង់ កាលនោះមានតម្លៃខ្លួន ៣,៣ លានដុល្លារ។ បង្ហាញខ្លួននៅ Premier League ច្រើនជាង ១ មុឺននាទី ស្មើនឹង ១៥៤ ប្រកួត កីឡាករវ័យ ៣៣ ឆ្នាំ រកបាន ៦ គ្រាប់និង Assist ៤ លើក។ តាមពិតទៅសមត្ថភាពរបស់គេ គឺខ្លាំង តែដោយសារស្មោះស្ម័គ្រជាមួយក្លឹបកម្រិតមធ្យម Southampton ទើបគេមិនមានឱកាសឈ្នះពានរង្វាន់សូម្បីតែមួយ។
៤) Sung-yueng Ki ជនជាតិកូរ៉េខាងត្បូង
គេបានអភិវឌ្ឍខ្លួនក្លាយជាកីឡាករអាជីពនៅក្លឹប FC Seoul ក្នុងប្រទេសកំណើត មុនផ្ទេរមក Celtic ហើយផ្ទេរមកក្លឹប Swansea កាលពីឆ្នាំ ២០១២ នៅតម្លៃ ៨,២ លានដុល្លារ។
ចន្លោះពេល ៨ ឆ្នាំប្រហែល Yoshida ដែរ កីឡាករលេងតំណែងបម្រើការពារ បានផ្ទេរជាបន្តបន្ទាប់ទៅក្លឹប Sunderland និង Newcastle មុនចាកចេញទៅ Mallorca នៅឯប្រទេសអេស្ប៉ាញ ហើយត្រលប់មកក្លឹបចាស់វិញកាលពីរដូវក្តៅឆ្នាំ ២០២០។ បង្ហាញខ្លួនសរុប ១៨៧ ប្រកួតជាមួយក្លឹប ៣ នៅ PL គេរកបាន ១៥ គ្រាប់និង Assist ១១ លើក។
៣) Sun Jihai ជនជាតិចិន
រាប់បានថានេះជាកីឡាករចិន តែមួយរូបគត់ ដែលអ្នកគាំទ្រស្គាល់ច្រើនជាងគេនៅ Premier League។ គេធ្លាប់លេងឲ្យក្លឹប Man City បានរយៈពេល ៦ ឆ្នាំ ក្រោយផ្ទេរចេញពីក្លឹបចិន DL Shide នៅតម្លៃ ៣,៨ លានដុល្លារ។
គេបង្ហាញខ្លួនសរុប ១២៣ ប្រកួត រកបាន ៣ គ្រាប់និង Assist ១ លើក ក្នុងនាមជាខ្សែការពារកណ្តាលដ៏សំខាន់មួយដែរ ឲ្យ City តែស្តាយសម័យកាលមុនឆ្នាំ ២០១០ ជាពេលវេលាដែលមេឃខៀវមិនមែនជាក្រុមខ្លាំងនៅអង់គ្លេសដូចពេលបច្ចុប្បន្ននេះទេ។
២) Son Heung-min ជនជាតិកូរ៉េខាងត្បូង
បើសួរថា តើកីឡាករអាស៊ីរូបណានៅ Premier League ដែលអ្នកគាំទ្រស្រលាញ់ចូលចិត្តបំផុត? ចម្លើយច្បាស់ណាស់ គឺប្រាកដជា Son Heung-min។ ខ្សែប្រយុទ្ធស្លាបវ័យ ២៩ ឆ្នាំ ត្រូវបានក្លឹប Spurs ចាយលុយ ៣៥ លានដុល្លារ ថ្ពក់យកគេចេញពីក្លឹបអាល្លឺម៉ង់ Leverkusen កាលពីឆ្នាំ ២០១៥។
សរុបស្ថិតិជារួមនៅ Premier League កីឡាករអាស៊ី Son រកបាន ៧២ គ្រាប់និង Assist ៤៣ លើកនៅការបង្ហាញខ្លួន ២០០ ប្រកួត។ គេធ្លាប់បានជាប់ឈ្មោះជាកីឡាករល្អបំផុតប្រចាំក្លឹប Spurs នៅរដូវកាល ២០១៨/១៩ និង ២០១៩/២០។
១) Park Ji-sung ជនជាតិកូរ៉េខាងត្បូង
នេះគឺជាកីឡាករជនជាតិកូរ៉េដំបូងបង្អស់ ដែលបានមកចូលរួមនៅ Premier League ហើយសមិទ្ធផលដែលគេសម្រេចបាន ក៏ជារឿងដែលគួរឲ្យចងចាំបំផុតដែរ។
ខ្សែបម្រើប្រយុទ្ធ Ji-sung បានផ្ទេរមក Man Utd កាលពីឆ្នាំ ២០០៥ ហើយបន្តឈរជើងដល់ឆ្នាំ ២០១២ មុនផ្ទេរទៅលេងឲ្យក្លឹប QPR និងជាក្លឹបចុងក្រោយមុនលោកប្រកាសចូលនិវត្ត។ សរុបស្ថិតិទាំងជាមួយ United និង QPR គេរកបាន ២០ គ្រាប់និង Assist ២៥ លើក នៅការបង្ហាញខ្លួនសរុប ១៥៣ ប្រកួត៕
ប្រភព៖ TransferMarkt