នៅរដូវក្តៅ ឆ្នាំតែមួយ ទាំងតារាឆ្នើម Lionel Messi និង Cristiano Ronaldo បានសម្រេចចិត្ត ផ្ទេរមកកាន់ក្លឹបនៅប្រទេសថ្មីមួយផ្សេងទៀតដូចគ្នា ដែលមានន័យថា ពួកគេក៏ចាំបាច់ត្រូវមានកន្លែងរស់នៅថ្មីជាមួយគ្រួសារផងដែរ។
នៅក្នុងអត្ថបទនេះ CTS Sports ធ្វើការបង្ហាញពីព័ត៌មានមួយចំនួន ក៏ដូចជាតម្លៃនៃផ្ទះថ្មីរបស់កីឡាករនៃក្លឹបបារាំង PSG និងក្លឹបអង់គ្លេស Man Utd៖
សម្រាប់ Leo Messi សព្វថ្ងៃនេះ គេកំពុងស្នាក់អាស្រ័យបណ្ដោះអាសន្ននៅឯសណ្ឋាគារលំដាប់ផ្កាយ ៥ Royal Monceau ក្នុងទីក្រុងប៉ារីស ពោលជាកន្លែងដែលលោកនិងក្រុមគ្រួសារស្នាក់នៅ តាំងតែពីការធ្វើដំណើរ មកដល់ប្រទេសបារាំង រយៈពេលជាង ១ ខែមកហើយ។
យ៉ាងណាតាមដំណឹងចុងក្រោយនេះ ភរិយារបស់ Messi គឺអ្នកស្រី Antonella Rocuzzo បានកំពុងពិភាក្សាជាមួយស្វាមី ដោយចង់មានផ្ទះស្នាក់នៅលក្ខណៈអចិន្ត្រៃយ៍មួយ ហើយកំពុងមើលឃើញប្រភេទវិមានដ៏ស្កឹមស្កៃមួយកន្លែង ដែលមានតម្លៃប្រមាណ ៤១ លានផោនឬជាង ៥៦ លានដុល្លារអាមេរិក។
វិមាននោះស្ថិតក្នុងទីក្រុងប៉ារីស កៀកនឹងកីឡដ្ឋាន Parc des Prince ដែលត្រូវធ្វើដំណើរប្រហែល ១៥ នាទីប៉ុណ្ណោះ។ វាត្រូវបានសាងសង់ឡើងនៅឆ្នាំ ១៨៩៩ ហើយមានបន្ទប់ធំតូចដល់ទៅ ៣០ នេះមិនទាន់រាប់បញ្ចូលទៅទីតាំងនៃអាងហែលទឹកខាងក្នុងផ្ទះ បន្ទប់រោងកុនឯកជន និងកន្លែងហាត់ប្រាណផង។
សម្រាប់វិមានដ៏ធំនេះដែរ ក៏ធ្លាប់ជាកន្លែងដែលអតីតប្រធានាធិបតីបារាំងលោក Charles de Gaulle ធ្លាប់ស្នាក់អាស្រ័យរយៈពេល ៣ ថ្ងៃ កំឡុងពេលកើតមានសង្គ្រាមលោកលើកទី ២ នៅឆ្នាំ ១៩៤០។ បើតាមការឲ្យដឹងពីប្រភពគេហទំព័រក្រៅស្រុក សង្កត់ធ្ងន់ថា Antonella និង Messi នឹងធ្វើការសម្រេចចិត្តចុងក្រោយ នៅពេលដ៏ខ្លីខាងមុខ ថានឹងគួរទិញយកវិមានខាងលើ ឬបែបណា តែតាមដឹងភាគរយច្រើន គឺជាចម្លើយវិជ្ជមាន ព្រោះវាជាកន្លែងដ៏សក្ដិសមបំផុតហើយសម្រាប់ម្ចាស់ពាន Ballon d’Or ៦ សម័យកាល និងក្នុងនាមជាកីឡាករស៊ីថ្លៃវាល់លាននៅក្លឹបសេដ្ឋី PSG។
ទៅមើលគូប្រជែង Cristiano Ronaldo ដែលកំពុងលេងឲ្យក្លឹប Manchester United ឯណោះវិញ ដើមឡើយលោករស់នៅក្នុងភូមិគ្រឹះមានតម្លៃជាង ៨ លានដុល្លារ ជាកន្លែងរស់នៅធំ មានបន្ទប់គេងដល់ទៅ ៧ ហើយមានបរិយាកាសបែបធម្មជាតិនៅជុំវិញនោះទៀតផង។ យ៉ាងណាក្រោយរស់នៅបានតែប៉ុន្មានសប្ដាហ៍ Ronaldo និងគ្រួសារ ក៏សម្រេចចិត្តផ្ទេរចេញ ក្រោមមូលហេតុមានសំឡេងរំខានពីហ្វូងសត្វចៀមនៅជុំវិញនោះខ្លាំងពេក ដែលធ្វើឲ្យលោកនិងគ្រួសារពិបាកគេង ហើយសុវត្ថិភាពនៅក្បែរនោះ ក៏ជារឿងគួរឲ្យបារម្ភថែមទៀត។
បើសួរថា អ៊ីចឹង Ronaldo នឹងទៅរស់នៅទីណានៅពេលបន្ទាប់? បើតាមការឲ្យដឹងពីសារព័ត៌មាន TheSun ចុះផ្សាយថា កីឡាករព័រទុយហ្គាល់ ក៏ដូចជាមិត្តស្រី Georgina Rodriguez និងកូនៗ ៤ នាក់ឯទៀត បានសម្រេចការផ្លាស់ទៅរស់នៅក្នុងភូមិគ្រឹះមួយកន្លែងផ្សេងទៀត នៅឯតំបន់ Cheshire ក្នុងទីក្រុង Manchester ដដែល ពោលគឺក្បែរតែកន្លែងរស់នៅចាស់ គ្រាន់ថា នឹងលែងមានសំឡេងរំខានដូចមុនទៀតហើយ។
ផ្ទះថ្មីនោះតាមដឹងមានតម្លៃតែជាង ៤ លានដុល្លារប៉ុណ្ណោះ តែក៏មាននៅអាងហែលទឹក រោងភាពយន្ត និងសន្តិសុខដើរល្បាតដូចមុនផងដែរ។ គួររំឭកថា ជាមួយការផ្ទេរមកក្លឹបថ្មី សម្រាប់ Ronaldo អាចទទួលបានថ្លៃពលកម្មតែ ៥២៩ ០០០ ដុល្លារ/សប្ដាហ៍ ធៀបនឹង Messi អាចទទួលបានដល់ ៨៥០ ០០០ ដុល្លារឯណោះ៕
ប្រភព៖ បរទេស