តារាឆ្នើម Dani Alves បានប្រកាសអំពីដំណឹងនៃការចែកផ្លូវជាមួយក្លឹប Sao Paulo នៅព្រឹកថ្ងៃសុក្រនេះ ពោលធ្វើឡើងមុនកាលកំណត់ ដែលត្រូវផុតនៅចុងខែធ្នូ ឆ្នាំ ២០២២ ឯណោះ។
កីឡាករប្រេស៊ីលក្រោយផុតកុងត្រាជាមួយ PSG គេបានសម្រេចផ្ទេរមកក្លឹបនៅប្រទេសកំណើតកាលពីខែសីហា ឆ្នាំ ២០១៩ ហើយក្រោយរួមជើងរយៈពេល ២ ឆ្នាំ ទីបំផុតគេក៏ចាកចេញទៅវិញ និងមិនទាន់ឲ្យតម្រុយពីក្លឹបថ្មី ឬត្រៀមចូលនិវត្តបែបណានោះទេ។
ស្ថិតក្នុងវ័យ ៣៨ ឆ្នាំ Alves ដែលជាប់ឈ្មោះជាកីឡាករឈ្នះពានរង្វាន់ច្រើនជាងគេក្នុងប្រវត្តិសាស្រ្តបាល់ទាត់ ពេលនេះកំពុងក្លាយជាកីឡាករទំនេរជើង ដូច្នេះមានន័យថា ក្លឹបទាំងអស់អាចមានសិទ្ធចរចាយកគេបាននៅលក្ខខណ្ឌឥតតម្លៃខ្លួន។ តាមចចាមអារ៉ាមចុងក្រោយ ក្លឹបដែលខ្សែការពារស្លាបខាងលើអាចផ្ទេរទៅ ប្រហែលជាក្លឹបមួយចំនួននៅក្របខ័ណ្ឌ Premier League ដូចជា Arsenal, Everton, Newcastle និង Man City ជាដើម៕
ប្រភព៖ TheExpress