Kylian Mbappe ជាខ្សែប្រយុទ្ធដ៏លេចធ្លោមួយរូបរបស់ក្លឹបបារាំង Paris Saint-Germain ហើយកំពុងត្រូវបានក្លឹបយក្ស Real Madrid តាមទិញនៅរយៈពេលចុងក្រោយនេះ។ យ៉ាងណាក្រៅពី Kylian សម្រាប់ក្លឹបសេដ្ឋីបារាំង ក៏កំពុងបណ្ដុះបណ្ដាលប្អូនប្រុសបង្កើតមួយរូបទៀតរបស់គេ មានឈ្មោះថា Ethan Mbappe ហើយបានចុះហត្ថលេខាឲ្យថ្នាលយុវជន PSG ដល់ចុងខែមិថុនា ឆ្នាំ ២០២៤។
ដូច្នេះនៅក្នុងអត្ថបទនេះ CTS Sports សូមធ្វើការជីកកកាយ និងលើកមកបង្ហាញនូវចំណុចគួរឲ្យចាប់អារម្មណ៍ ៥ ដែលអ្នកគួរដឹងពីក្មេងប្រុសតូចខាងលើ៖
៥) គេកើតនៅឆ្នាំ ២០០៦
Ethan កើតនៅថ្ងៃទី ១៥ ធ្នូ ឆ្នាំ ២០០៦ ដែលមានន័យថាដល់ចុងឆ្នាំនេះ ទើបគេឈានចូលអាយុ ១៥ ឆ្នាំ។
នេះបើធៀបនឹងបងប្រុសរបស់គេ គឺ Kylian រាប់ថាមានអាយុខុសគ្នា ៨ ឆ្នាំ។ យ៉ាងណាឱកាសនៃការរួមជើងជាមួយគ្នាលើទីលាន នៅក្លឹប PSG ផ្ទាល់ថាមិនត្រូវវាអាចកើតឡើងទៅបាន នៅប៉ុន្មានឆ្នាំបន្ទាប់ ប្រសិនណាការផ្ទេរទៅក្លឹប Real Madrid មិនអាចកើតឡើង គួបផ្សំនឹងសមត្ថភាពនៃការខិតខំប្រឹងប្រែងក្នុងការអភិវឌ្ឍខ្លួនរបស់ Ethanមកកាន់ឈុតធំ។
៤) ប្រាក់ខែដែលគេទទួលបានពីថ្នាល PSG
នៅឯប្រទេសបារាំង មានក្លឹបថ្នាលជាច្រើនដែលគេអាចមានឱកាសទៅចូលរួម តែសម្រាប់ Ethan គឺជ្រើសយក PSG ជាក្លឹបដូចបងប្រុសរបស់គេដែរ។ ជាមួយសុពលភាពកុងត្រាដល់ចុងខែមិថុនា ឆ្នាំ ២០២៤ សម្រាប់ក្មេងប្រុសវ័យ ១៤ ឆ្នាំ អាចទទួលបានថ្លៃពលកម្ម ៤៥០ អឺរ៉ូ ឬជិត ៥៣០ ដុល្លារ ក្នុងមួយខែ សម្រាប់ការលេងឲ្យឈុត U16។
៣) គេមានបងប្អូន ៣ នាក់
Kylian និង Ethan គឺជាបងប្អូនបង្កើត តែគេមានបងប្រុសមួយរូបទៀត ឈ្មោះថា Jires Kembo Ekoko ដែលត្រូវបានម្តាយឪពុករបស់ Mbappe រើសយកមកចិញ្ចឹមតាំងតែពីនៅតូច។
Ekoko ក៏ជាកីឡាករអាជីពមួយរូបផងដែរ ហើយបច្ចុប្បន្នកំពុងលេងឲ្យក្លឹប Bursaspor នៅឯប្រទេសទួរគី។
២) អាចរកបានគ្រាប់បាល់នៅប្រកួតបើកឆាក
សមត្ថភាពរបស់ Ethan Mbappe គឺមិនណយនោះទេ ដោយគេបានមកចូលរួមជាលើកដំបូងនៅថ្នាលយុវជន PSG តាំងពីឈុតក្រោមអាយុ ១២ ឆ្នាំ កាលពីឆ្នាំ ២០១៨។ ពេលនោះ Ethan បង្ហាញខ្លួននៅការប្រកួតពាន Mediterranean International Cup ហើយក៏រកបានគ្រាប់បាល់បើកឆាក នៅជ័យជម្នះ ៩-០ ទៅលលើថ្នាល YS Gem Academy របស់ប្រទេសជប៉ុន។
១) គេជាអ្នកនៅពីក្រោយ ស្ទាយអបអររបស់ Kylian Mbappe
ឲ្យតែពេលស៊ុតបញ្ចូលទី អ្នកគាំទ្រប្រាកដជារមែងឃើញ Kylian Mbappe ឈរដាក់ដៃខ្វែងសងខាង ជាមួយទឹកមុខយ៉ាងមាំ ដោយតាមពិតទៅស្ទាយអបអរនោះ គឺជារបស់ប្អូនប្រុសតូច Ethan Mbappe។
បើតាមការបញ្ជាក់កាលពីឆ្នាំ ២០១៧ Kylian និយាយថា ស្ទាយអបអរនោះ ខ្លួនធ្វើតាមប្អូនប្រុសគឺ Ethan ដែលគេតែងតែបង្ហាញចេញមក នៅពេលលេងម៉ាស៊ីនហ្គេម PlayStation ជាមួយគ្នា៕
ប្រភព៖ SI