Cristiano Ronaldo បានប្រើប្រាស់សន្ទុះល្បឿន ៣២,៥ គ.ម ទៅទទួលយកបាល់ដែលកាត់ចេញពីជើង Luke Shaw ហើយបញ្ចប់ទី រកគ្រាប់បាល់ឲ្យក្លឹប Man Utd បានយ៉ាងល្អកាលពីប្រកួតទល់ Newcastle។
អាយុ ៣៦ ឆ្នាំហើយ ហេតុអ្វី Ronaldo នៅតែរត់បានលឿនយ៉ាងនេះ ហើយកាយសម្បទាមើលទៅនៅតែមាំ ដូចក្មេងស្រករ ២០? សំណួរនេះ ទំព័រ CTS Sports មានចម្លើយធំ ២ ដែលអាចបកស្រាយជូនអ្នករាល់គ្នាបាន។
នោះគឺពាក់ព័ន្ធនឹងរបបអាហារ និងរបៀបនៃការគេងរបស់ Ronaldo សុទ្ធតែខុសពីមនុស្សទូទៅទាំងស្រុង ហើយកត្តាទាំង ២ វាដើរតួយ៉ាងសំខាន់ក្នុងការកំណត់នៅភាពរឹងមាំនៃរាងកាយកីឡាករព័រទុយហ្គាល់ដូចដែលកំពុងមានសព្វថ្ងៃនេះ។
ទី ១) យើងនិយាយពីរបបអាហារដែល Ronaldo ទទួលទាន គឺសុទ្ធតែជាអាហារសុខភាព ហើយលោកមិនលូកដាច់ខាតនៅគ្រឿងស្រវឹង ក៏ដូចជាអាហារដែលមានជាតិខ្លាញ់ច្រើន។ បើតាមការទម្លាយពីអតីតមេចុងភៅរបស់ Ronaldo គឺលោក Girgio Barone ដែលធ្លាប់ជាអ្នកចម្អិនអាហារឲ្យអតីតកីឡាករ Juventus ទទួលទានរាល់ថ្ងៃកាលពីនៅប្រទេសអ៊ីតាលី និយាយថា៖ “វាមិនមែនជាប្រភេទអាហារដែលមានតម្លៃថ្លៃអ្វីនោះទេ តែវាគឺជាអាហារសុខភាព ដែលជាអាហារធម្មជាតិមានដូចជាសាច់ត្រី ស៊ុត ផ្លែបឺរ ប្រេងដូង អង្ករខ្មៅ ក៏ដូចជាសាច់គោ តែមិនយកសាច់ជាប់ខ្លាញ់ដាច់ខាត”។
លោកបន្តទៀតថា៖ “សម្រាប់ Ronaldo គឺគាត់មើលថែរាងកាយរបស់គាត់ ដូចជាមនុស្សយើងថែទាំស្រលាញ់រថយន្ត Ferrari មួយគ្រឿងអ៊ីចឹង”។
បញ្ជាក់ថា ទាក់ទិននឹងរបបអាហារដែលតារាឆ្នើមវ័យ ៣៦ ឆ្នាំទទួលទាន ពេលចុងក្រោយនេះក៏មានឥទ្ធិពលទៅលើមិត្តរួមក្រុម និងយុវជនក្មេងៗជំនាន់ក្រោយនៅក្លឹប Man Utd ផងដែរ។ ដោយតាមការឲ្យដឹងពីអ្នកចាំទី Lee Grant និយាយថា ជាទូទៅកីឡាករក្លឹបបិសាចក្រហម ក្រោយពេលទទួលទានអាហារពេលល្ងាច គឺតែងតែមានទម្លាប់លូកអាហារសម្រន់ និងនំនែកមួយចំនួននៅលើតុ តែចាប់តាំងពីមាន Ronaldo គឺពួកគេសម្លឹងមើលចានអាហាររបស់ Ronaldo សិន រួចទម្លាប់ទទួលទានតែអាហារសុខភាពប៉ុណ្ណោះ រីឯប្រភេទនំនែកនិងអាហារសម្រន់ដែលមានជាតិ Cream ជាតិស្ករខ្ពស់ គឺលែងហ៊ានលូកដូចពីមុនទៀតហើយ។
ទី ២) គឺរបៀបដែល Ronaldo គេង គឺលោកមិនទម្លាប់គេងពេញម៉ោងដូចមនុស្សយើងទូទៅ រយៈពេល ៦ ទៅ ៨ ម៉ោងអ្វីនោះទេ ផ្ទុយទៅវិញគឺលោកចែកជាកំណាត់ម៉ោងខ្លីៗ ដែលមើលទៅក៏គួរឲ្យចាប់អារម្មណ៍ម្យ៉ាងដែរ។
នោះគឺ Ronaldo រៀនសូត្រពីអ្នកជំនាញផ្នែកគេងលោក Nick Littlehales ដែលបានចែកកាលវិភាគនៃការគេងជា ៥ ចំណែកក្នុងមួយថ្ងៃ។ ក្នុងមួយចំណែកគឺ Ronaldo សម្រាករយៈពេល ៩០ នាទី ឬស្មើនឹង ១ ម៉ោងកន្លះ ដូច្នេះក្នុងមួយថ្ងៃ បើគិតទៅបុរសវ័យ ៣៦ ឆ្នាំ គេងបាន ៧ ម៉ោងកន្លះ។
របៀបគេងបែបនេះ លោក Littlehales និយាយថា វាជាវិធីសាស្ត្រដែលជួយឲ្យរាងកាយរបស់យើង ត្រលប់មកភាពរឹងមាំឆាប់រហ័ស ក្រោយពីយើងបានចំណាយពេលហ្វឹកហាត់ច្រើន។
កត្តាទាំង ២ ខាងលើនេះហើយ បាននឹងកំពុងជួយឲ្យកាយសម្បទាកីឡាករព័រទុយហ្គាល់ មើលទៅនៅតែក្មេង ហើយខ្លាញ់ក្នុងរាងកាយ សម្រាប់កីឡាករធម្មតាមាន ១១ ភាគរយ តែ Ronaldo មានតែ ៧ ភាគរយប៉ុណ្ណោះ ដូចគ្នាទៅនឹងម៉ាសសាច់ដុំ ដែលគេមានទាបជាង ៤៦ ភាគរយ តែ Ronaldo មានដល់ ៥០ ភាគរយ៕
ប្រភព៖ SportBible