Radamel Falcao បានក្លាយជាកីឡាករបាល់ទាត់ចុងក្រោយមួយ ដែលជ្រើសរើសលេខអាវមើលទៅខុសទំនងពីកីឡាករទូទៅ។ ជាមួយការផ្ទេរទៅក្លឹបថ្មី Rayo Vallecano ក្រោយពីផ្តាច់កុងត្រានៅ Galatasary សម្រាប់បុរសវ័យ ៣៥ ឆ្នាំ បានជ្រើសយកអាវលេខ ៣ ក្នុងនាមជាខ្សែប្រយុទ្ធ។
នេះបានធ្វើឲ្យគ្រប់គ្នាភ្ញាក់ផ្អើលខ្លាំង ព្រោះអាវលេខ ៣ ភាគច្រើន ជារបស់ខ្សែការពារ ឬខ្សែបម្រើប្រើប្រាស់ទេ ហើយកម្រមានណាស់ ដែលខ្សែប្រយុទ្ធប្រើអាវលេខ ៣ ឬលេខទាបជាងលេខ ៧ នោះ។
យ៉ាងណា សាមីខ្លួនហាក់ពេញចិត្ត ហើយនិយាយអំពីការផ្ទេរមកចូលរួមនៅក្លឹបដែលកំពុងឈរនៅលេខ ១២ ក្នុងតារាង La Liga បែបនេះថា៖ “នេះជាឱកាសសម្រាប់អាជីពរបស់ខ្ញុំ ខ្ញុំពិតជារីករាយនឹងការមកចូលរួម នៅកន្លែងដែលផ្តល់ទំនុកចិត្ត ផ្តល់ឲ្យខ្ញុំនៅចំណែកក្នុងក្រុមដ៏ល្អមួយ ហើយខ្ញុំក៏ធ្លាប់បានស្គាល់កីឡាករមួយចំនួននៅទីនេះពីមុនមកដែរ”។
គួរបញ្ជាក់ដែរថា Falcao ក៏ធ្លាប់ជាអតីតខ្សែប្រយុទ្ធនៅក្លឹប Chelsea, Man Utd និង Atletico Madrid ជាដើមផងដែរ។ សរុបស្ថិតិជារួមរបស់គេ កីឡាករសញ្ជាតិកូឡុំប៊ីបង្ហាញខ្លួនសរុប ៥១០ ប្រកួត រកបាន ២៩៥ គ្រាប់និង Assist ៥៤ លើក៕
ប្រភព៖ SportBible