អ្នកចាំទីក្លឹបតោខៀវ Chelsea គឺ Edouard Mendy នៅប្រកួតទល់ Zenit កាលពីយប់មិញ បានរក្សាបាល់ Clean Sheet មិនឲ្យចូលទីបន្តទៀតហើយ ក្រោយពីចប់ការប្រកួតក្រោមលទ្ធផល ១-០ ទៅលើក្រុមរុស្ស៊ី។
នេះបានក្លាយជាការប្រកួតដែល Mendy អាចសង្រ្គោះបាល់ Clean Sheet ១០ លើកនៅព្រឹត្តិការណ៍ UEFA Champions League នៅការបង្ហាញខ្លួនលើកទី ១៣ ដែលវាក៏ជាកំណត់ត្រាដ៏ល្អមួយផងដែរ។ យ៉ាងណាកីឡាករសេណេហ្គាល់ នៅចាញ់ស្ថិតិចាស់របស់អតីតអ្នកចាំទីក្លឹប Real Madrid គឺ Keylor Navas ដែលបុរសសញ្ជាតិកូស្តារីកាចាយពេលប្រកួតតិចជាង ពោលត្រឹម ១១ ប្រកួតប៉ុណ្ណោះ។
គួរបញ្ជាក់ថា បុរសវ័យ ២៩ ឆ្នាំ មានស្ថិតិល្អតាំងពីផ្ទេរមកលេងថ្មីថ្មោងឲ្យ Chelsea កាលពីរដូវកាលមុន ហើយកាលក្លឹបអង់គ្លេសទិញ ចាយអស់តែ ២២ លានផោនប៉ុណ្ណោះ។ គេគឺជាចំណែកសំខាន់ជួយឲ្យក្រុមរបស់លោក Thomas Tuchel ឈ្នះពានរង្វាន់ UEFA Champions League រដូវកាលចាស់៕
ប្រភព៖ AF