ការប្រកួត UEFA Champions League វគ្គចែកពូល រដូវកាលថ្មី ២០២១/២២ នឹងឈានចូលមកដល់ទៀតហើយនៅយប់នេះ ដែលមានគូ Young Boys ទល់ Man Utd ជាជំនួបបើកឆាក មានផ្សាយផ្ទាល់លើទំព័រ CTS Sports នាវេលាម៉ោង ១១:៤៥ នាទីយប់។
ជាការពិតសម្រាប់ព្រឹត្តិការណ៍ដណ្តើមពានរង្វាន់អឺរ៉ុប ការរកគ្រាប់បាល់គឺជារឿងដែលពិបាកនឹងធ្វើ ខុសពីការលេងនៅលីគប្រចាំប្រទេសនីមួយៗ ព្រោះអីវាជាការប្រមូលផ្តុំនៅក្រុមខ្លាំងមកប្រកួតប្រជែងគ្នា ហើយក្រុមដែលអាចស៊ុត ៤-៥ គ្រាប់ ឬឈានដល់ ៨ គ្រាប់/ប្រកួត គឺជារឿងដែលមិនធម្មតាហើយ។
ដើម្បីញាំងឲ្យការទស្សនានៅរាត្រីនេះ កាន់តែជក់ចិត្ត CTS Sports សូមលើកជ្រុងមួយមកបង្ហាញ ដោយពាក់ព័ន្ធនឹងឈុត ១១ រូប ដែលអាចរកគ្រាប់បាល់បានច្រើនបំផុត រាប់តាំងពីតំណែងអ្នកចាំទី ដល់ប្រយុទ្ធ។ ក្នុងនោះមានដូចជា៖
អ្នកចាំទី: Hans-Jorg Butt ដែលនេះគឺជាអ្នកចាំទីរកបានគ្រាប់បាល់ច្រើនបំផុតនៅ UCL ដោយលោករកបាន ៣ គ្រាប់ ហើយអ្វីដែលគួរឲ្យចាប់អារម្មណ៍នោះ គឺសុទ្ធសឹងជាគ្រាប់បាល់ទល់ក្លឹប Juventus តែជាការឈរជើងឲ្យក្លឹប ៣ ផ្សេងៗគ្នា។
ខ្សែការពារស្លាបឆ្វេង: Roberto Carlos បង្ហាញខ្លួននៅ UCL ច្រើនជាង ១០០ ប្រកួត លើកពានបាន ៣ លើក សម្រាប់ Carlos ក៏ជាប់ឈ្មោះជាខ្សែការពាររកបានគ្រាប់បាល់ច្រើនដាច់គេ ធ្វើបានដល់ទៅ ១៦ គ្រាប់។
ខ្សែការពារកណ្ដាល: Sergio Ramos សម្រាប់តារាឆ្នើមវ័យ ៣៥ ឆ្នាំឯណេះវិញ បង្ហាញខ្លួនជិត ១៣០ ប្រកួតនៅ UCL លោកអាចរកបាន ១៥ គ្រាប់និង Assist ៨ លើក ដូច្នេះ Ramos អាចមានឱកាសបំបែកកំណត់ត្រារបស់ Carlos នៅពេលខាងមុខបាន។
ខ្សែការពារកណ្តាល: Gerard Pique កីឡាករធ្លាប់លើកពាន UCL ៤ សម័យកាល បានបង្ហាញខ្លួនជិត ១២០ ប្រកួត ហើយរកបាន ១៥ គ្រាប់ស្មើនឹង Ramos ដែរ។ អ្វីដែលគេចងចាំបំផុត គឺគ្រាប់បាល់ ២ គ្រាប់ផ្ទួនគ្នារបស់ Pique កាលលេងទល់ Inter Milan នៅរដូវកាល ២០០៩/១០។
ខ្សែការពារស្លាបស្តាំ: Dani Alves បង្ហាញខ្លួនច្រើនជាង ១០០ ប្រកួតនៅ UCL សម្រាប់កីឡាករប្រេស៊ីល អាចរកបាន ១២ គ្រាប់និង Assist ១៦ លើក។
ខ្សែបម្រើស្លាបឆ្វេង: Ryan Giggs ការចាយពេលជាង ២ ទសវត្សជាមួយ Man Utd សម្រាប់អតីតកីឡាករសញ្ជាតិវែល អាចរកបាន ២៨ គ្រាប់និង Assist ៤៦ លើកនៅ UCL។
ខ្សែបម្រើកណ្តាល: Frank Lampard ជាអ្នកស៊ុតតាមស្មើឲ្យ Chelsea នៅវគ្គផ្តាច់ព្រ័ត្រទល់ Man Utd កាលពី UCL ឆ្នាំ ២០០៨ តែស្តាយចុងក្រោយចាញ់បិសាចក្រហម ក្រោយការស៊ុតប៉េណាល់ទីកាត់សេចក្តី។ Lampard រកបាន ២៣ គ្រាប់សរុបនៅការប្រកួតពានអឺរ៉ុប។
ខ្សែបម្រើស្លាបស្តាំ: David Beckham អតីតម្ចាស់ជើងឯក UCL ជំនាន់ឆ្នាំ ១៩៩៩ និងជាកីឡាករដែលមានជំនាញក្នុងការស៊ុតបាល់ Free Kick អាចរកបាន ១៦ គ្រាប់សរុបសម្រាប់ការលេងឲ្យក្លឹប Man Utd និង Real Madrid។
ខ្សែប្រយុទ្ធស្លាបឆ្វេង: Cristiano Ronaldo ជាកីឡាកររកបានគ្រាប់បាល់ច្រើនបំផុតក្នុងប្រវត្តិសាស្តពាន UCL ដោយតារាឆ្នើមសញ្ជាតិព័រទុយហ្គាល់ ធ្វើបាន ១៣៤ គ្រាប់នៅការលេងឲ្យក្លឹប ៣ ផ្សេងគ្នា។ នៅរដូវកាល ២០១៣/១៤ CR7 មានសន្ទុះគ្រាប់បាល់ខ្លាំង ដោយរកបានដល់ទៅ ១៧ គ្រាប់ឯណោះ។
ខ្សែប្រយុទ្ធកណ្តាល: Robert Lewandowski នៅរដូវកាល ២០១៩/២០ គ្រាដែល Bayern Munich លើកពាន UCL សារនោះកីឡាករប៉ូឡូញរកបាន ១៥ គ្រាប់នារដូវកាលទោល។ គ្រាប់បាល់សរុបរបស់ Lewandowski មានដល់ ៧៣ គ្រាប់ ហើយរឿងដែលគេចងចាំឥតភ្លេច គឺលោកជាកីឡាករស៊ុត ៤ គ្រាប់ប្រើពេលខ្លីបំផុត ពោលត្រឹមតែ ១៤ នាទីទល់ក្លឹប Crvena Zvezda។
ខ្សែប្រយុទ្ធស្លាបស្តាំ: Lionel Messi បន្ទាប់ពី Ronaldo គឺ Messi នេះហើយជាអ្នករកបានច្រើនគ្រាប់បំផុត ពោលគឺ ១២០ គ្រាប់។ ប៉ុន្តែ Messi មានកំណត់ត្រាគួរឲ្យចងចាំមួយ នោះគឺជាការស៊ុតទល់ក្លឹបទាំង ៣៦ ច្រើនបំផុតនៅ UCL ហើយលោកក៏ធ្លាប់រកបាន ៥ គ្រាប់/ប្រកួតផងដែរកាលពីឆ្នាំ ២០១២៕
ប្រភព៖ TransferMarkt