ប្រធាន La Liga លោក Javier Tebas បានបង្ហាញការយល់ឃើញថា រឿងចាយវាយរបស់ក្លឹប Paris Saint-Germain ដ្បិតមិនស្ថិតក្នុងលីគរបស់ខ្លួន តែវាក៏ជារឿងដែលត្រូវបើកការស៊ើបអង្កេតផងដែរ ព្រោះវាពាក់ព័ន្ធនឹងពិភពបាល់ទាត់ទាំងមូល។
គ្រប់គ្នាកំពុងសង្ស័យថា PSG ដើរហួសព្រំដែនច្បាប់ FFP លើការចំណាយថ្លៃពលកម្មសម្រាប់កីឡាករ ព្រោះមួយរយៈចុងក្រោយពួកគេចាយឥតសំចៃដៃ ហើយក្នុងក្រុមអាចរក្សាទុកជើងសុទ្ធតែបណ្តុំកីឡាករស៊ីថ្លៃកប់ពពក។ ពាក់ព័ន្ធនឹងបញ្ហានេះលោក Tebas យល់ឃើញថា ក្លឹបបារាំង មិនខុសពីផែនការណ៍ការបង្កើតក្របខ័ណ្ឌថ្មី Super League នោះទេ។
លោក Tebas មានប្រសាសន៍៖ “La Liga មានកីឡាករវ័យក្មេងដូចជា Vinicius ហើយ [ឆ្លើយក្រោយការសួរនាំពីក្តីបារម្ភអំពីបាត់បង់ Messi, Ronaldo/Neymar] រីឯបញ្ហារបស់ PSG គឺយើងនឹងចូលរួមដោះស្រាយ ព្រោះអ្វីដែល PSG កំពុងធ្វើនេះ វាគ្រោះថ្នាក់ដូចតែនឹងផែនការណ៍បង្កើត Super League អ៊ីចឹងដែរ”។
“យើងនឹងបន្តអភិវឌ្ឍ ដ្បិតការចាកចេញរបស់ Messi ហើយយើងនឹងធ្វើការប្រឆាំងក្លឹបទាំងនោះ [PSG] ព្រោះពួកគេគឺជាសត្រូវដ៏គ្រោះថ្នាក់ដូចជា Super League”៕ ប្រភព៖ Sportskeeda